Zirtawpni kaltaa filmstar lar Puneeth Rajkumar thihna chuan ngawng na tak thlenin mi pakhat a intihhlum a, midang pahnih chu heart attack-in an thi bawk.
Kum 46 mi thih thu hian lemchan khawvel mai bakah amah ngaisang a, zuitutute a barkhaih hle a. Karnataka, Maruru khuaa chenga kum 30 mi Muniyappa chuan filmstar thih thu a hriat veleh a buai zui a, kir leh tawh lo turin a nupui leh fa pahnihte a kalsan a ni.
Filmstar mai ni lo, power star tih hiala sawi hat hat Rajkumar thih thu hi pawm harsa a ti a, Lo neia eizawng a ni a, TV hmâah a \ap zawih zawih a, a hnu rei vak lovah âwm na takin tlak buak zuiin, Ponnachi Primary Health Center panpui nghal a ni a, mahse doctor te’n an chhan hman lo.
Shindoolli khuaa cheng fan pakhat Parashuram Demannananavar pawh Rajkumar thih thu TV-a puan a nih khan insum zo lovin a \ap hawm hawm a, heart attack nasa tak nei zuiin, zirtawpzan vek khan a thi.
Report dang lehah chuan Athani, Karnataka-a cheng fan pakhat thinrim leh lung-awi thei lo chu a intihlum. Rahul Gaadivaddara hian a room-a zah taka a tar Rajkumar thlalak chu chibai a buk hnu ah khawvel a chhuahsan a ni.
A ngaihsan leh zah em em thihna chu eng-tikawngmahin a pawm thei lova, a rilru na lutuk chu awmngaihna pawh hre lovin a dâng lawp lawp mai niin, a chhungte’n an sawi a, zahna chibai hnuhnung a buk hnu-ah a inawkhlum zui ta a ni.
Kum 35 mi Satish hi Saligrama-a cheng auto-rickshaw pu a ni a, Rajkumar thih thu hian a deng na hle a, rilru mumal pu thei lovin a buai zui a. A hnu-ah a kutphah sawm deuh vek khawpin a chek vak vak a ni awm a, tunah hian Damdawi In lamah enkawl mek a ni.
Powerstar
Kananada supterstar hi naupangte anih lai atang tawha lemchan khawvela hming chher thei a ni a, film hit tak tak 29 zetah lead actor niin, huhang a nei na zui hle a. Media leh fan te chuan ‘Powerstar’ tih hiala kovin, an dah chungnungin, an ngai ropui hle.
Rajkumar hi October 29, 2021 Zirtawpni khan Bangalore-ah a thi a, nimin khan state chawimawina famkim nena thlah liam niin, lemchan khawvel mai ni lo, PM Modi leh sorkar hotu lawk tak takte bakah milar tam takin an ui thu an sawi hlawm nghe nghe a, a vuinaah hian fan maktaduai khat chuangzet an pung-khawm a ni.