Lungleia Bawlhhlawh kalpui dawn
- Mahmuaka Chhakchhuak
Lunglei khawpuia Bawlhhlawh thliar hran kalpui dan tur puanga HPC Vice Chairman hoa March 31, 2021 nia Press meet neihnaah chuan Department lam pawhin ruahmanna fel tak an siam tawh tih sawiin Lunglei Town Sanitation Task Force chuan hetianga kal hi tul an ti nia sawi a ni. HPC Vice Chairman Pu Lawmawma Tochhawng hian a sawi zelnaah chuan tun dinhmunah chuan bawlhhlawh bawm sem tumna a awm rih loh thu a sawiin Solid Waste Management Project siam mek a taka kalpui a nih hnuah BPL Family te hnenah bawlhhlawh bawm subsidy-a pekchhuah tum a nih thu a sawi a, chhungtinte he hmasawnna rahbi thar rap tura inpuahchah a tul thu a sawi a ni. He hunah hian Lunglei Town Sanitation Force Chairman leh DC ni bawk Kulothungan A chuan bawlhhlawh thiarhran mumal taka kalpui hi India ram hmun tam takah pawh kalpui tawh a ni a ti a. India ram state danga Swachh Dooth Campaign lo kalpui tawh angin Lungleiah pawh khawpui chhung Self Help Group 158 hnuaia member te chu In tinah kalkualin door-to door awareness campaign ngawrh taka kalpui a nih tur thu a sawi.
Pu Andrew Lalhruaia, DUDO pawhin thusawiin Lunglei khawpui chhunga bawlhhlawh thliarhran kalpui dan tur a sawifiahin Lunglei khawpuiah April 1, 2021 atang chuan chhungtin te’n bawlhhlawh tawihthei leh thei lo thliar hran vek tur a nih thu a sawi a. Lunglei Khawpui chhungah VC 24 awmin UD&PA Department-in VC 9-ah Department motor-in bawlhhlawh a khawn a, VC 15-in anmahni veng/ YMA motor hmangin bawlhhlawh an khawnin an paih thin a. UD&PA Department-in bawlhhlawh a khawn thinna veng 9 bikah hian bawlhhlawh tawih theilote hi kartin thawhtanni atanga zirtawpni thlengin lirthei pali te’n veng hrang hrangah an khawn khawm thin dawn a, bawlhhlawh tawih theite chu kar tin thawhlehni apiangin lirthei pali bawkin an khawn khawm dawn a ni. VC 15 dang, anmahni veng/ YMA motor hmanga bawlhhlawh khawna paih thin te chuan tawih thei lo leh tawih thei khawn ni hi anmahni veng mil leh an remchan dan angin veng bil atan schedule an in siam ve dawn nia sawi a ni.
Hetianga Lunglei khawpui chhunga Bawlhhlawh paih dan tura ruahmanna awm hi a lawmawm hle mai a, Aizawl khawpui ngei pawhin mumal taka thliarna lo nei tawhin vawiin thlenga ala kalpui dan a ni a. Chutih lai erawh chuan Aizawl khawpuiah ngei pawh AMC inthlan dawn apianga thu inchuh lian tak pakhat ala ni rengin Eptu lamin AMC vawnfung chelhtute chu bawlhhlawh pai dana mipuite phurrit siamsak a, a taka bawlhhlawh sawngbawl dan kalpui mumal leh si loah an puh a, bawlhhlawh paihna hmunte tlawhin tawih thei leh tawih thei lote pawh an la paih pawlh mai mai niin an sawi. Hetiang hian Lunglei khawpuia bawlhhlawh paih dan pawh April 22, 2021 niah Zonet JB palai chuan a hmun ngeiah kalin Lunglei Solid Waste Management Centre chu a hmunah an tlawh a. Bawlhhlawh paih danah hian hmalakna thar a awm lo tiin an sawi.
Sorkar lamin a tira ruahmanna an siam ang hian chhungtinte pawhin bawlhhlawh hi reilote chu an han thliar ve deuh hman a, nimahsela rei an thliar hman loin tawih thei leh tawih thei lo hi hmun khatah dahkhawm a ni leh a, hei hi a paihna hmuna an paih khawm leh tho vang niin an sawi. Tin, UD&PA lamin bawlhhlawh khawnkhawmna atana Motor an hman pawh hian kawngpui dung chauh a tlan thin avangin veng tam takah chuan YMA lamin lirthei dang hmangin bawlhhlawhte hi an khawn bawk a, veng kilkhawr thlengin bawlhhlawh hi khawn a ni. Heng bakah hian chhungtinte hian bawlhhlawh paihna lirthei hmanna man hi thlakipin Rs. 100/- te pek thin a niin dawr neite chuan hei aia tam pawh an pe bawk a. Kan awmna veng, Lunglei Chanmari-ah chuan a tir atang khan tawih thei leh tawih thei lo hi thliar tura ngenna lehkha kan dawng nain a taka thliarna engmah a awm chuang lo a, vawiin thlengin hmun khatah paih khawm vek ala ni thoin YMA Motor-in kar khatah vawi khat a rawn khawn khawm thin.
Lunglei khawpui chhung hmun hrang hranga awmte kan biak kual danin bawlhhlawh hi thliarna a awm hran lem lo ni awm tak a ni a, chuvangin sorkar lamin April 1, 2021 ni atanga bawlhhlawh thliarna a kalpui hi a hlawhtling lo nia ngaih a ni. Hei hi mipui lam thiam loh nge sorkar lam thiam loh ni ang tih hriat tumin Oct. 19, 2021 niah khan Lunglei Solid Waste Management Centre chu a hmun ngeiah zuk tlawh a ni a, Tawih thei paihna leh Tawih theih lo paihna chu a hrangin a awm tho nain Zonet JB lamin an lo sawi tawh ang hian bawlhhlawhte hi thliar hranna engmah alo awm loin Tawih theilo (Dry Waste) paihna hmun phei chu hnar hup ngei ngei ngai khawpin alo rimchhia a, sa uih tawih rim ni ngeia hriat a ni. Tawih thei (Wet waste) paihna hmunah hian Plastic chhiar leh leivung lamte pawh paih a ni bawk a, bawlhhlawhte hi thliar hranna engmah awm loin paih liam tawp tawp ni ngeia hriat a ni.
Lunglei Solid Waste Management Centre buatsaih hi Contractor kuta awm nia hriat a ni a, chutih lai erawh chuan Contractor chuan a hmun laih zawl bak thawk loin pawisa a dawn loh avangin a chhunzawm lo nia hriat a ni. Hemi atan hian DoNER atang sum leh pai dawn nia sawi a niin engzat chiah nge sum hi dawn a ni tih chu hriat a ni lo thung a, heng bakah hian bawhzuina a awm tha lo bawk nen hian April 1, 2021 ni atanga mumal taka bawlhhlawh thliar hrana kalpui tura ruahmanna hi a hlawhtling lo a ni. Heti reng a nih chuan nakin lawkah Aizawl khawpui ang bawkin Lunglei khawpui hian harsatna ala tawk vein Politics inbeihna hmanruaah ala chang thei ngei dawna rin a ni.
Ruahmanna tha tak a awm a, inbuatsaihna pawh a that hmel viau bawk nain bawhzuina a awm leh si loh avangin tunah chuan thil thar engmah awm loin Lunglei khawpui chuan bawlhhlawh paih danah a hma ang bawka a kal danin ala kal leh reng hi a pawi hle mai. Hei hi mipui lam dem tur niin alang lo a, sorkar lam mawhphurhna liau liau zawk niin a hriat a. Khawpui daia bawlhhlawh paihna hmunah ngei pawh hian kham panga paih thlak mai a lui kawra zuk thleng thla tura tih hi a tira ruahman dan chu a ni chiah lo mai thei a, heti a nih chuan nakin lawkah keimahni ngeite hian kan la tuar leh thei a; lui tui a tihbawlhhlawh mai bakah harsatna dang pawh ala rawn awm theiin a rinawm. Chuvangin Lunglei khawpuia bawlhhlawh kan paih dan hi enfel vat nisela a fello laite siamthat niin ruahmanna fel taka kalpui theih nisela a tha hle a ni.