India leh khawvel huap pawha boxer lar, MC Mary Kom pasal, K. Onkholer chuan nakuma Manipur assembly inthlan lo awm turah chuh ve a tum.
Onkholer-a hian inthlan chuh ve a tum thu hi Inrinnia vantlang inkhawmah a puang.
Inthlan hi Churachandpur district-a Saikot bialah a chuh dawn a ni.
“He bialah hian hmasawnna tak tak thleng turin tih ngai thil tam tak a la awm a ni,” tiin Onkholer-a hian Manipur assembly inthlan a chuh ve dawn thu a puannaah hian a sawi.
Onkholer-a hian assembly inthlan lo awm tur a chuh dawn thu puang tawh mah se eng party nge a zawm dawn tih a la sawi lo va, independent-in nge a chuh dawn tih pawh engmah a sawi lo bawk.
Independent-a a chuh mai erawh rinna a lian ber a, eng party mah zawm tur lam emaw, sawmtu emaw sawi thawm a awm lo va. An chenna bial tihhmasawn nan chuh a tum mai nia ngaih a ni.
Hetih mek lai hian rorel lai, BJP chuan Onkholer-a hian an party hminga chuh turin an beisei tih sawi a awm deuh va. Congress hruaitu hlun, TN Haokip chu bial vawng mektu a ni.