Indian Prime Minister Narendra Modi chuan Pope Francis hmuin India ram tlawh turin a sawm a, kum 2017 khan tlawh lo tum tawhin eng emaw avangin a hlawhtling ta lo.
Modi-a hi Vatican-ah Pope nen hian inkawmin India tlawh ngei turin a sawm.
Indian prime minister hi Rome khawpuia khawvel ram lian 20-te intawh khawmna, G20 summit-ah a tel a ni.
Pope zinga India tlawhtu hnuhnung ber chu John Paul II niin kum 1999 khan a tlawh.
Mi thiamte chuan Modi-an an ram tlawh tura pope a sawm hi tun hnaia Kristian pawh telin, India-a sakhaw zuitu tlem zawkten tihduhdahna leh an laka tharum thawhna an tawn fo boruaka sawm a nih an ring.
Modi-a party, BJP hi Hindu ruhkawl leh an thuthlung pawh inanga ngaih a ni a, India-a Hindu lalram din tum anga sawi an ni \hin a; mahse, amah chuan a pha thung.
Prime minister hian zin tura pope a sawm thu hi Twitter-ah tar langin inkawmna hlawk tak an hmang tih a sawi a. Pope Francis nen thil zau tak sawina hun remchang an nei tih a tar lang bawk.
The Hindu chanchinbu chuan hruaitu pahnihte hian retheihna um bo dan tur leh sik leh sa inthlak nasa lutuk tihziaawm dan tur leh thil dang dang an sawi tih a tar lang.
Sakhaw zalenna chungchang an sawi leh sawi loh erawh hriat theih a ni lo.
India ramah hian Hindu an tam ber a; mahse, Kristian maktaduai 24 vel an awm ve a, hei hi ram mipui zinga 2% vel tihna a ni.
Pope Francis-a pawh hian Modi-a sawmna hi ngai pawimawhin India tlawh a châk thu a sawi.
Kum 2016 khan a kum leha India tlawh chu tihchian tluk a nih thu a lo sawi tawh a; a \henawm, Bangladesh leh Myanmar a tlawh hnuah Indian Catholic hruaitute chuan Modi-a chu an ram tlawh tura sawm turin an nawr thlu zo ta lo a ni.