Tuirial bial MLA by election neih zawh taka party pali candidate-ten beiseina sang tak an neiin tlin an inrin ngei thu an sawi hlawm.
The Zozam Times-in candidate palite hi polling station an fan kualna hmunah a kawm a, an boruak a \hat thu an sawi vek a, lo vanduai palh ta pawh nise an party hotuten rem an tih chuan bial chu vil zui zel an tum thu an sawi.
Rorel lai MNF party candidate K Laldawngliana chuan bial mipuiten ruling bial nih an duh vek a, chumi avang chuan a tlin ngei a inbeisei tih a sawi a, Tuirial bial chhung hmasawnna atana tih tur hmachhawp tam tak a neih thu leh an mamawhte an hriat tam tawh thu sawiin, lo vanduai palh pawh ni se an tan ke a pen zel ang a, an party hotute leh bial mipui duh angin vil chhunzawm zel a tum tih The Zozam Times a hrilh.
INC candidate Chalrosanga Ralte chuan Tuirial bialah Congress party candidate-te thlan tlin fo an lo ni tawh a, bial mipuite hian Congress party chu an lo awn rei tawh tih sawiin, bye-election neih turah he bial chhunga Congress party mite an kai tho \ha bawk nen, a tlin ngei a beisei tih sawiin, lo vanduai palh ta pawh nise an party hotuten helai hmuna ding leh tura an duh phawt a nih chuan helai bial hi a politics khelh tawpna turah a ngai tih a sawi.
ZPM candidate Laltlanmawia chuan Tuirial bial chu ZPM party bial vawn lai, ZPM thlawp Andrew H Thangliana thlan tlin a lo nih tawhna a ni tih sawiin, chu bakah Mizoram dinhmunah kalphung thar mipui sorkar din chu he bial mipuite hian an beisei nia hriat thu leh chumi avang chuan mipuiin an thlan tlin ngei a beisei tih a sawi a, he bial hi vil zui zel a tum thu sawiin, “Thlan tlin ka nih chuan hmachhawp tam tak ka nei a, Pu Andrew-a hma lo lak tawhna te kha tih puitlin chhoh ka tum a, lo vanduai palh pawh ni ila, ka hmachhawp sate ka ti ang, bialtu hlui boral ta hmachhawp tihhlawhtlin lohte chu a puitlin nan hma ka la tho ang,” a ti.
BJP candidate K Laldinthara chuan an khingpuite hrawlin sum leh pai nei, party ngialnghet tawh ni mah se an belh tur chu Central-a BJP sorkar tho a nih thu sawiin, bial mipuite hian thuneitu tak hi an party an ni tih an hria a, chumi avang chuan tlin ngei a inbeisei tih a sawi bawk.