UFC 267 : UFC champion ni thei upa ber dawttu Glover Teixeira

Mixed martial arts veteran Glover Teixeira chuan kum 20 chuang a nghah tawh UFC title a nghak chhuak a. Inrinni zanah UFC 267-ah UFC light heavyweight champion thar ni turin Jan Blachowicz a hneh.

Kum 42 mi Teixeira hi UFC chanchin a champion ni thei upa ber dawttu niin kum 43 mi ni chunga champion Randy Couture hnuaiah a awm a, UFC title a vawikhatna atana la thei upa ber a ni bawk.

Etihad Arena-ah Teixeira hian Blachowicz hi round hnihnaah a hneh a, round khatnaah pawh wrestling-ah thunun zawkin tunhnaiah a zawna vawi 6 nan a chak.

Kum 2002 atanga MMA a bul tan Teixeira hian visa lama harsatna a neih avangin kum 2012 khan UFC hi a zawm chauh a. 205 pound huangah title chuh thei zingah lang fo mahse a tawp a thleng thei lo thin.

“Kum 20 ka bei a, sawifiah ngaihna ka hre lo. Kum 42 mi ka ni tawh a, thil kalphung pangngai kalhin ka kal miah miah mai. Tumah hi kan beidawng tur a ni lo, tupawn eng pawh sawi se, hmalam kan pan ngat ngat reng tur a ni.” tiin a chak hnuah a sawi.

Bout dangah bantamweight champion thin Petr Yan chuan interim bantamweight title la turin round nga chhungin Cory Sandhagen a hneh a. Fight of the Night a thlan bout a fighter pahnih inhmachhawn a hmuhnawm. Mi tam takin anni pahnih hi tuna champion lai Aljamain Sterling aiin undisputed title inchuh phu zawkah an ngai.

Lightweight contender Islam Makhachev chuan 155 pound title chuh a phuzia lantirin Dan Hooker round khatnaah a hneh nghal a. Title fight a duh thu a chak hnuah sawiin lightweight champion thin Khabib Nurmagomedov hnuaia training Makhachev hi a zawna vawi 9 chak mek a ni a, kumin bikah vawi thum a inlanna niin submission hmangin a chak vek, mi thenkhatin tunhnaia lightweight fighter tha berah an chhal.

Chechen fighter lar chak Khamzat Chimaev chuan Li Jingliang chu round khatnaah a hneh nghal bawk a. Middleweight ah pawh khel thei wrestler kutthlak na leh tharum ngah Chimaev hian welterweight-ah inlanin chak turin minute khat leh second 44 bak a mamawh lova. UFC-ah vawi li inlan tawhin vawikhat chiah chiang taka kutthlak a la tuar a. Professional MMA-ah vawi 10 khel tawhin a chak vek a ni satliah lova, point hmanga chak a la mamawh lo vek.

Leave a Reply

Your email address will not be published. Required fields are marked *

error: Content is protected !!