Chawhmeh Zuar Roa
- Zirsangkima
Total lockdown puan a nih lai phei kha chuan a khawsak loh theih loh a, an khawsa ve nãw nãw tak zet zet \hin. A nu nachhawkna, Diclowin man pawh to an ti far far fo!
…..
Cristiano Ronaldo thu khawchâng, ‘Thawhrimna tel miah loa talent ringawt rinchhan chu eng tihna mah a ni lo (Talent without hardwork is nothing)’ a tih ang chiah kha a ni.
…..
Zirtawpni zàn a nih tawh chuan mipa naupang kum 12 mi, chawhmeh zuar Roa tán chuan homework tihna hun a awm thei tawh lo. Lehkha zira homework tih nán chuan hun ãwl a mamawh \hin a; chutiang hun ãwl chu Roa tán chuan ‘ro’ tluk thuakin a hlu hial \hin ang chû. Mahse, pâwl ruk zirlai Roa chuan chutiang ‘ro’ anga hlú, hun ãwl chu a nei thei tlat \hin lo. A tûk Inrinnia a chawhmeh zawrh tûr, khaw hrang hrang Sumo, Aizâwla chawhmeh rawn phur thleng tûrho chàn a ngai \hin a…
Nikum hri lèn hma lawk a\ang khân a nu hi a dam lo \an a; tûnah pawh a la mu reng. Damdawi inah an inenkawl ve rèn râwn a; rei an inenkawl thei lo. A natna ber hre tûr ringawt paw’n test hrang hrang tih a ngai a; chutiang tih nán chuan an sum neih an khawh ral zo mai dâwn si a. A natna ber an hriat chhuah hma hawtin an inla chhuak ta ngawt mai a nih kha. A ná a chhuah chángin Paracetamol leh Diclowin an dawlhtir leh mai \hin a. Chutianga inenkawl chu an tlin leh theih chin a ni rih mai si a.
Sikul kal ve \hin Roa chuan hri léng avangin a nu thawh \hin chawhmeh zawrh chu a chhunzawm a \ûl ta a. Ti ila, a \hiante ang thoin in lamah lehkha chu a zir ve \hin tho. A pa chu ni tina inhlawh chawp \hin, mitiri pawh ni lo, mitiriho puitu, ‘helper’ a ni. Roa chuan nau pathum a la nei a; an chhúngkua member zât chu paruk an nih chu.
Total lockdown puan a nih lai phei kha chuan a khawsak loh theih loh a, an khawsa ve nãw nãw tak zet zet \hin. A nu nachhawkna, Diclowin man pawh to an ti far far fo! Khatih lai khân ‘chaw \hing’ tih \awngkam te, ‘vawk chaw tur’ tih te hi an chhûngkaw dictionary-ah a chuang ngai lo chiang asin aw…
Khawtláng hruaitute fel zár zoin a pa nên chawhmeh zawrh phalsak an ni hlauh mai. Chutah, inzawrh ni bik te kha an han nei chho a. Han \ang viau \hin mah se, sum thawh chhuah chu a har \àng \àng \hin viau a ni.
Tûna hetia hri léngin ziaawm lam a’n pan deuh hnû, a pa pawh a inhlawh ve leh theih tâk hnû leh kawng síra chawhmeh zawrh an phal leh tâk hnû hian Roa chuan a nu ‘seat’ \hin chu luah zuiin a nu thawh \hin chawhmwh zawrh chu a thawk chhunzawm ta zêl a ni.
Sikul kal thei se la an va’n buai dâwn tehrêng aw … nasa takin an buai ang chû! A chhang chiah Zuii chuan pâwl li a zir ve tawh a; an tê berin pawl khat a zir ve tawh bawk si. Sikul an kal dial a ngai dâwn a… Mahse, sikul kal se an buai viau ang, kan ti tak nã a, sikul an kal theih loh lai pawh hian an buai fú tho mai—online-a class kalna ber phone chungchângah. Thingtlânga awm, Roa nî phone hlui chu an chhúngkaw phone a ni mai si a. A nau Zuii nên online-a class an neih hun a inrual \hin si; a ni inchhâwkin online class an inkal chhâwk mai \hin. A kal loh nî-in Roa chuan a \hiante note leh homework te a lâk chhàwn a ngai ve leh \hin bawk si a…
Tûn Inrinni khân chawhmeh zuara a \hutna ngai, a nu ‘seat’-ah bawk chuan Roa chu ka hmu leh a. Amah chuan min hre chuang lo. Inrinni bazar ní, mi tam ní a ni a. An vêng chawhmeh bazar, ti ila, bazar kawt kawngpui sírah chuan mi an zi hut hut mai. Covid-19 hrî a léng tawh lo emaw tih pawh awl a ni.
Roa chuan chawhmeh a lo chhap ve dal mai. Hla angreng fáa ka \hianpa dàwr a\angin ka thlír ru reng a. A khát tâwkin a mit a nuai leh zauh zauh \hin. A hma zàn a meng rei a nih ka ring deuh. Amah dàwrtute chu \ha takin a lo chhawn zêl a, a inhralh ve zeuh zeuh.
Chûng zawng zawng aia ka thil hmuha ka rilru khawih bertu chu—a thil ken, a zir lai, a note bu chu a ni. Dàwrtu a neih loh laiin a note bu chu a bih leh zauh zauh \hin a, a cháng leh a chhiar leh mial mial \hin; a chángin mit chhíng chung ten.
Roa chuan chawhmeh zuar pahin lehkha a zir reng tho a nih chu! Inah lehkha zirna hun a nei lo a ni ang! Inrinniah lehzêl chuan an test êm chu ka ring chiah lo a; mahse, chawhmeh zuar paha thiam ngei ngei ngai a nei nual tawh a ni ngei ang. |hahnem a ngaih êm êm dàn chuan ka rilru hi a vit váwt váwt tak zet a ni!
Ka fate ka ngaihtuah chhuak zawk a—an vànneihzia zawng zawngte nên. Tin, taimâk leh \hahnemngaih kawnga Roa an tluk lohzia thleng paw’n. Lehkha zirna hun aiin YouTube lama inawih tleina hun an ngaih zâwkzia te, social media dawhsàna pho chhuah tûr thlalâk tuihnai tak tak an ngah tawhzia leh neih belh zêl tuma ‘posi’ an lâk nasat êm êm \hinzia te hi aw… ‘Phone-a social media khawih tam hi an zir lai exam-naa tih \hatna,’ ti se hi ka ti \hin a nia aw … an ti dáwn chatuan hian ka ring si lo a!
‘Chhúngkaw khawsakin a zir ve te a ngai a…’ tih ang \awngkam te hi hlawhtlinna leh hlawhchhamna hriltu a nih ka ring ngai lo. Talent ang chiah a ni. Tûnlai khawvêla ball pét thiam ka tih ber, Cristiano Ronaldo thu khawchâng, ‘Thawhrimna tel miah loa talent ringawt rinchhan chu eng tihna mah a ni lo (Talent without hardwork is nothing)’ a tih ang chiah kha a ni.
Talent ropui te, hausakna te, thiam theihna te, thlahtu ropui neihte hi a hlú; mahse, thawhrimna nèn lo chuan hlawhtlinna kawngka hi kik hawn ngawt theih a ni ngai lo ang. Eng pawh ni ila, eng ang chhûngkua a\ang paw’n sei lianin chawr chhuak mah ila, thawhrimna tel lo chuan hlawhtlinna hi hlawh chhuah theih a ni lo. Inrochun ngawt chi pawh a ni lo e!