Bial hmangaihtu tak tak a hriat chhoh dawn chiah?
Tuirial bial bye-election a vote tlate chu vawiinah chhiar a ni dawn ta a, pakhat chauh tling tur an nih miau avangin tling zo ve ta lote pawhin an pawm thiamin, an thusawi hrang hrang umzui leh bawhzui kawngah tha thlah lo se a tha awm e.
Inthlang rama awm kan nih miau avangin kan aiawha rorelna dawhkana thu tur kan thlang thin a, chumia chak ngei tum chuan party tinten thapui an thawh thin bawk. Hetiang a nih avang hian inbeihna pawh a nasa in, hmalak theihna zawnah inelna a na duh phian reng a, a tawp tlata hre thintu tan pawh mit mimna tur hi a tam phah thin hle a ni.
Tuirial bial inthlan thatna awmah pawh hian party paliten tlin ngei tumin candidate an vawrhchhuak a, tling zo ve ta lo pathumte pawhin an tlin lohna pawm a, bial tana hna an thawh chhunzawm zel a tul awm e.
An thusawi leh intiamna hrang hrangte kan hre chamchi tawh a, bial tana lo lang ve zawk leh hmangaihtu tak tak pawh an hriat chhoh zel dawn bawk. Bial dangte pawhin inzir nan lo hmang ve nghal thei se a tha hle.
Hun hmasa lamah chuan candidate tling zo ve ta lote an reh zui vang vang a, an hneh tak loh tawiawm a, thawhpui leh mipuite pawh hre zui tawh lo an awm thin. Chutiang mite chu bial tana mi tha an ni ngai lo a, an ngaihsak zui miau loh avangin party atanga seat chan nan chauh an ding ve tih a chiang reng. Ram leh bial hmangaihtu tiin sawi an har hle.
Inbeihna boruak hot tak hnuaiah Tuirial bial pawhin tling zo ve ta lote dinhmun an enzui reng dawn a, nakin zela mahni awmna party sawihnawmna tur thil ti lo turin tling zo ta lote pawh lo inbuatsaih lawk teh se.