Lo neitu pawl hruaitu, Rakesh Tikait chuan Thawh\anni khan sorkar vauna thu chhak chhuakin November 26 thlenga farm law a hnuk kir lo a nih chuan Delhi ramria dan thar duh lohna an lantir mek chu nasa zawkin an lantir dawn tih a sawi.
Bharatiya Kisan Union (BKU) chief-in hetianga vauna a tihchhuah hi lo neituten dan thar duh lohna an lantir a\anga kum khat a tlin dawnah a ni.
“Sorkar laipui hian November 26 thleng hun a la nei a, November 27 a\ang chuan lo neitute hian Delhi chhehvela dan thar duh loh lantirna hi kan khua a\anga tractor-a panin chak leh zualin kan awm dawn,” tiin Twitter-ah a tar lang.
Tun \uma sorkar vauna hi ni hnih chhunga a vawi hnihna a ni ta a. Pathianni khan Tikait-a hian Delhi daia an inkulhna a\anga nawr chhuah luih a tum a nih ngat chuan nasa zawka chetna a thleng dawn tih a lo sawi tawh bawk.
“Ramri a\angin lo neitute hi nawr chhuah an tum a nih phawt chuan ram puma sorkar pisate hi Galla Mandi (thlai thar zawrhna hmun)-ah a chang a ni mai,” a ti.
Tikait-a hian an pun khawmna hmuna puan in an kaihte chu thuneituten pawh chhiat an tum a nih vaih chuan lo neitute chu police station leh district magistrate pisaah an inkulh mai tur thu a sawi bawk.
“Thuneituten kan puan inte hi rawn \hiah an tum tih kan lo hria a. An rawn ti a nih chuan lo neitute hian police station leh DM pisaah kan puan in kan kai zui mai ang,” tiin ANI a hrilh.
Tar lan tawh \hin angin lo neitu sang tel chu parliament-a lo neihna kaihhnawih dan thar pathum siam thar duh loh lantir nan Delhi khawpui luhka pathum – Tikri, Singhu leh Ghazipur-ah nikum November 26 a\ang khan an inkulh tawh.
Lo neitute hian dan tharte chu anmahni tihchhiat theihna tur niin an sawi a, hetih lai hian sorkar chuan an ham\hatna tur zawk niin a sawi.
Sorkar leh lo neitute hi vawi tam an inbe tawh a; mahse, lungawina khawp an la sawi chhuak thei lo zel a ni.
Farm law tia an sawi, Indian parliament-a pass takte hi lo neitute chuan an sum lak luh tihhniam theihna tur leh nakin zela mi hausa kuta an tlukluh phahna mai turah an ngai a, sawiho a nih lai atang tawhin an duh lo tih an aupui tawh.
Lok Sabha-ah September 17, 2020 khan inhnialna nasa tak karah pass niin Rajya Sabha-ah pawh September 20, 2020-ah pass zui a ni a. President Ram Nath Kovind chuan September 27, 2020-ah dan ni turin a hming a ziah hnan zui.
Lo neituten ram chhung hmun hrang hrang, a bikin Punjab leh Haryana-ah nasa taka duh lohna an lantir hnuah January 12, 2021 khan Supreme Court chuan dan tharte chu hman rih loh turin a ti a, dan tharin lo neitute a nghawng theih dan turte zirchiangtu tur committee a din bawk.
Lo neitute chuan heng dan hian kharchhawngtu a tibo dawn a, sorkarin thlai thar leisaktuten an leisak theihna man hniam ber a tuksak thin a bo dawn niin an sawi a, hei hi an duh loh lian ber a ni.
Sorkar chuan kharchhawng bo ta chu lo neituten duh duh hnena an thar chhuah an hralh theihna tur remchang, zalenna an neihna zawk nia sawiin a man bi a thliahsak thin pawh a bo dawn lo niin an sawi.
Inbiakna tam tak awm tawhin sorkar pawh tawlh hret tawh mah se lo neitute hian hlih hmak an phut si avangin thu a la tawp thei lo.