Kan tawngtaina zawng zawng hi chhanin a awm em?
- Rinfela Zadeng
Awlsam takin – chhang vek lo – tiin kan thupui hi kan sawi nghal thei awm e. Mahse Lal Isua’n Tlang chunga thu a sawinaah khan ‘Dil rawh u, tichuan an pe ang che u;’ tiin Matthaia ziak 7:7-ah min hrilh a; kan tawngtaina zawng zawng hi kan dil ang taka chhanna erawh kan hmu vek hauh lo mai. Lal Isua hian dawt a sawi em ni? Tawngtaina chungchang hi Bible behchhanin kan thiam tawkin i han zir nawn teh ang u.
Dil ula, zawng ula, kik rawh u
Chanchin Tha Luka ziak 11:5-13 leh Matthaia ziak 7:7-11-ah hian Lal Isua’n tawngtaina awmzia chhawng thum min hrilh a; ngenngawl tak leh bang loin, min hmangaihtu Pathian a ni tih hre renga tawngtai turin min zirtir a. Zan reiah pawh kan thiante hnenah chuan chhang kan dil ang leh, a hlawhltin hma chu kan nghak ang hian Pathian chuan min pe duh a ni tih hre renga nghak turin min hrilh. Nu leh pa te pawhin kan fate hnenah an dil ang emaw a aia tha zawk emaw kan pe thin angina Pathian chuan kan dil aia tha leh zual zawk pawh min pe dawn a ni tiin Lal Isua hian min zirtir a ni.
Kan duh ang taka pek tur kan ni em?
A chunga kan sawi taka ng hian kan thil dil, zawn leh kik te chu pek, hmu leh hawn a ni ang tiin Lal Isua’n min hrilh a; kan dil ang chiah chiah em ni kan dawn ang? Pathian remruatna leh duh dang anga pek kan ni ang tih hi Lal Isua thusawi awmzia chu a ni. ESV Global Study Bible-in a hrilfiah dan chua kan thil dil leh kan tawngtaina te chu Pathianin a duhdan ang takin a chhang a ni tih min hrilh. Kan tawngtaina leh kan dilna zawng zawngte hi Pathianin a hre vek a; rilru dik tak leh inngaitlawm taka kan dilna leh kan tawngtaina zawng zawngte hi chhanna pek kan ni vek dawn a; Pathianin a duhdan leh kan tan tha turin min chhangin min pea ng tih Lal Isua hian min tiam a ni.
Kan dil dik lo thin em?
Kan tawngtaina tam tak hi kan duhdan leh mi dangte chhiatna tur rilru kan pu tel em? Chanchin Tha Matthaia ziak 6:5 ah hian rilru vervek tak leh mahni inngaihlu leh mi mit lak tuma tawngtaina te khan van ram a thlen zawh loh tur thu Lal Isua hian a sawi a, an lawmman chu an hmuh zawh tawh thu a sawi a nih kha. Midang chhiatna tur te, mahni hlawkna leh chawimawia kan awmna tura tawngtaina te, Pathian aia mahni ropuina zawk tur te, kan hmalam hun zela kan tana tha lo tur thil kan dil te hian Pathian chuan a aia thaw zawk leh kan duh ang ni loin chhanna min pe zawk thin a ni.
Pathian chatuan remruatna
Tin, Pathian remruatna leh ropuina lanchhuahna tur thil kalh zawnga tawngtaina hi Pathianin kan dil ang takin a chhang let ngai lo tih pawh Gethsemane huna Lal Isua tawngtaina atang khan kan hre thei. Lal Isua khan khawvel sualna zawng zawng phura Krawsa khenbeha awma thih kha mihring takin a hreh ve hle tih kan hmu a, mahse khawvel chhandamna hna a thawhna tur atan thih a ngaih miau avangin Lal Isua kha a thi a; a thawhlehna chu Pathian ropuina remruatna tihfamkimna a ni tih kan hre vek awm e. Thihna te pawh hi Pathian chatuan remruat a ni tlat avangin damna duhin tawngtai fo mahila kan thi dawn tho tho tih kan hre vek awm e. Lal Isua’n a damlaia mitthi a kaihthawh te ngei pawhin thihna chu an pumpelh bik lo tih a taka hretu te kan ni.
Tawngtaina chu awmze nei lo a ni em?
Ni lul lo e; kan duh ang tak pek leh hmuh tir kan ni fo tih a taka hretu te kan ni. Lal Isua thupek zawmin kan dilin kan zawng ang a, kan kik bawk ang a, kan dil ngat ngat bawk a. Pathian chuan kan tawngtaina, kan dilna, kan zawn leh kan kik te chu a hre vek a, kan tana a tha thei ang ber turin min chhan sak vek bawk tih Lal Isua min hrilh. Kan mamawh leh kan duh te pawh kan dil hma hauhin Pathian chuan a hria a, min pe a, malsawmna tam takin min vur a ni tih pawh a taka hretu leh changtu kan ni. Tisa lam thila kan duhna zawng zawng nena kan tawngtaina te hi kan duh ang takin a chhana chu kan dawng lo a nih pawhin kan thlarau lam tak chuan hlawkna kan char belh phah a. Kan chunga thil thleng tawrh dan, hmachhawn dan leh pawm dan te kan thiam phah thin. Tawngtai nasat vanga inchhir an la awm ngai lo a, tawngtai tlem te zawk zel hi kan inchhir thin zawk a ni.
Khawvela kan awm chhungin Pathian rorel dan leh remruat dan kan hrethiam zo ngai dawn lo a, harsatna leh thihna hi kan pumpelh ngai lo ang. Tawngtai mi, tawngtaia innghat tlat mi, tawngtaina nena Pathian dawr tam mihring kan nih tlat chuan kan inchhir ngai lo ang a; Pathianin a duhdan zawka kan tawngtaina a chhan dan pawh kan hrethiam zel bawk ang.