Prime minister hlui, Manmohan Singh-a nupui, Gursharan Kaur chuan Thawhtanni khan All India Institute of Medical Sciences (AIIMS), Delhi-a thawktu zawng zawngte chungah rang taka Congress hruaitu hlun an enkawl dam avangin lawm thu a hrilh.
Singh-a hi Pathianni khan ram chhunga damdawi in tha bera ngaih atang hian a haw thei tawh a, chawlhkar khat chuang mah dengue avangin an enkawl niin a nupui hian a sawi.
Thuchhuah a siamah Kaur chuan, “Kei leh ka chhungte hian lawm takin, kan thiante leh Dr Manmohan Singh-a a dam leh thuai theih nana ngaihventute chu dengue lakah a him tawh tih ka hrilh che u a ni,” a ti.
“AIIMS-a thawktu zawng zawng – doctor, nurse leh mi dangte pawh, an chungah kan lawm tak zet a. A dam chhuah leh theih nana duhsakna hlantu leh thinlung taka min ngaihsaktute chungah lawm thu kan sawi tak meuh meuh a ni,” a ti bawk.
Singh-a hi October 13 khan AIIMS-ah hian a taksa a chak loh zual em avangin dah luh a ni a, hemi hnuah hian doctor-ten theihtawp chhuahin an enkawl.
Kum 89-a upa ni tawh, Singh hi April thla khan coronavirus a kai ve avangin damdawi in thaah hian dah luh a lo ni tawh bawk a. Prime minister thutthlenga vawi hnih lo thu tawh hian September 26 khan a kum 89-na cham a thleng a ni.
Economist hriat hlawh tak hi nikum pawh khan a taksa chak lo leh chet vel harsat avangin AIIMS-ah hian dah luh a lo ni tawh bawk.