Tottenham Hotspur chuan tun nipuia an manager ni tura an lakluh Nuno Espirito Santo chu thla li chiah an hnena hna a thawh hnuah an ban.
Spurs hian an league match hnuhnung pasarih atangin vawi nga an tlawm a, Inrinni zanah an mualah goal nga chhuah a mualpho hlim Manchester United lakah 3-0 in an tlawm. Premier league-ah pariatna niin hmahruaitu Chelsea chu point 10 in an pha lo mek.
Tottenham managing director of football Fabio Paratici chuan an thutlukna chungchang sawiin, “Tun dinhmun kan thleng a, hetia hma kan lak a ngai tak hi pawi ka ti hle. Nuno leh a coaching staff-te hian hlawhtlin an tumzia ka hria.”
“Nuno hi pa zahawm tak mai a ni a, helaiah hian a tan hmun a awm reng tawh ang. Ani leh a coaching staff te chungah hian lawmthu kan sawi duh.” a ti a. Tottenham hian Nuno kalsan tak hna thawk tur hian coach thar an lakluh thuai tur thu an sawi a, Italian coach Antonio Conte hming a ri ring nghal.
Tu thiam loh nge?
Kum 47 mi Portuguese coach hian June thla khan Spurs-ah hian kum hnih contract a ziak a, Wolverhampton Wanderers-ah kum li chhung hlawhtling taka hun a hman hnuah London club a zawm.
August thla a Premier League manager of the month chawimawina dawngtu Nuno hi ‘ber’ thla an kai hnuah an che fuh hleithei lo chhova. An result chhia bakah a football khelhdan avang leh fan lungawi lo avangin club in an ban nia ngaihna a awm a. Amah thlaktu tur thlir telin Spurs in thutlukna siam an hmanhmawh niin an ngai bawk.
Hmun thenkhatah erawh Nuno-a’n club in hun awlsam lo tak a tawnlai takin a enkawltu chan a chang chu a vanduai nia ngaihna awm ve thung a. Captain leh striker rinrawl Harry Kane chhuah duhna in boruak a luah lian a. England striker hian khelmualah beisei a pha lo mek bawk.
Hei bakah hian Covid 19 avanga football club-te sum hlohin Spurs hi a nghawng ve thova, European Super League tel an tumna avanga fans lungawi lo boruakin Tottenham chairman Daniel Levy leh board-te hming a ti chhe tawh bawk.
Nuno lakluh a nih dan leh Kane-a chungchang-ah Levy-a thil tihdanin dem a hlawh a. Jose Mourinho thlaktu an dapin an duh ang manager in an hnar zel hnuah chawpchilh takin Nuno an dawr a, an ti fuh lo.
Tunge thlak ang?
Tun dinhmun a hming ri ring ber chu Conte a ni a, London a cheng tawh coach hian Premier League leh FA Cup a chawi tawh. May thla a Inter a chhuahsan hnuah hna thawh a duh leh tawh.
Manchester United nen sawizawm nimahsela Red Devils in an coach an thlak a nih pawhin an duhthlan hmasak a ni dawn lo nia ngaihna a awm a, ani bakah nipui laia sawizawm ni tawh Paulo Fonseca a awm bawk a, mahse Spurs hian nizan khan Italian coach hi an be nghal a, vawiin lamah inremna an neih theih an ring.