Good Governance

Good Governance

  • Dr. C. Lalrampana

A KAMKEUNA:
India-in zalenna a hmuh hnu kum 67-na 2014 atang khan Sorkar laipui chuan inrelbãwlna tha kalpui turin ke a pen ve tan chauh a. Khami kum atang khan kumtin Dec. 25 chu Good Governance Day (Susasan Divas) atana hmang thin turin a ruat a; Hei hi Prime Minister hlui Shri Atal Bihari Vajpayee pian champha denchhena ruahman a ni a; Khawvel Kristiantte tan phei chuan Isua Krista pianni anga ngaih Krismas ni chiah a ni lehnghal a, Good governance bul tan nan pawh a inhmehin a inrem hle niin a lang.
India PM hmasaber Jawaharlal Nehru, Indian National Congress khan kum 1952-1962 kum 17 chhung PM nihna a chelh a. A hnuah PM 13-in India Sorkar an kaihruai tawh a, tuna PM Modi hi PM 14-na a ni mek. Mizoramah pawh CM 5-in Mizoram Sorkar an kaihhruai tawh a; mahse, Good Governance kalpui kan la tum tlang mek chauh niin a lang.

GOOD GOVERNANCE CHU?
Sorkar inrelbãwlna tha leh inkaihhruaina tha, langtlang sorkar leh mipui huapzo sorkar hi Good Governance chu a ni a. he tehkhawng hi a tlin phak loh erawh chuan Sorkar tha lo, sorkar chhia (bad governance) a tih theih ang. December 25, 2014 hma lam zawng India Indepence day atanga chhuta Kum 67 chhung kha sorkar tha lo (bad governance) kan hrawn thin tihna a ni ngei ang. Mizoramah pawh Mizo District Council 1952-2014 kum 62 chhung zawng khan sorkar tha lo (bad governance) kan hrawn thin tihna a ni thei bawk ang.

GOOD GOVERNANCE-IN A KEN TELTE?
Hriattir phalna dan (Right to Information (RTI) Act-2005 hman a nih chinah he dan hian khuhhawnna (openness); lan tlang theihna (transparency); Sorkar inrelbawlna leh rorelna kawnga mipui mamawh leh hriat duhte hriattir tura mawhphurh theihna (accountability)
-te a keng tel a, hei hian mipui hriat phak loha thil dik lo inthup tur tam tak awm theite chu a lãi lang zung zung thei a ni. Heng baka Good Governance -in a ken tel ngei ngei tura ngaihte chu:
Eirukna laka fihlim (corruption free);
Dikna, thianghlimna, felna (Integrity);
Rules & regulation tha neiha dik taka hman leh zawm;
Dan leh thupek (law & order) tha neiha tha taka zawm leh kenkawh;
Development hna tha taka thawh leh dik taka kalpui;
Mipui chanvo ngaih pawimawha inlungrualna, leh zalenna neih;
Tlin tawkna (efficiency) neia mipui tana thawh;
Mamawh phuhruk /chhãn theihna (responsiveness) nena hna thawh;
Tangkaina leh sãwtna (effectiveness) neia thawh;
Nundan tha leh khawsak tha (ethics) nena hna thawh;
Physical & organizational structures tha neih;
Social & economic infrastructure tha neih. etc.
Heng lo pawh hi sawi tur tam tak a la awm thei a, sawi vek sen a ni lo.

ENGNGE KAN TLAK CHHAM CHU?
A lan dan maiah chuan good governance tehfung (qualification) hi kan nei kim vek tawh a; kan qualify tawh hle niin a lang. Technology hrang hrang thlirin communication technology bikah phei chuan good governance tehfung kan bát pha niin a lang. Mahse, a tak ramah erawh chuan kan la phãk lo (disqualify) chiang hle niin a lang. Good governance nih kan la tlin lohna lai langsãr zualte chu:

EIRUKNA:
Good governance-ah chuan mipui chanai eirukna a bo tur a ni. Mahse, kan ram hruaitute ber CM-te meuh pawhin rorelna court-ah eiruk thubuai an awrh thin niin a lang a; Social Media hrang hrangah hmuh tur a awm. Hetih lai hian rorelna court hmaa finfiah a nih meuh chuan an fihlimleh tho thin. Dik lo taka inpuhna vang mai em ni ang tih chu suangtuah tham tak a ni. Chutiang zelin sorkar milian bureaucrats zingah pawh eiruk thubuai awrh an awm fo bawk. CMs hlui Pute Ch. Chhunga & Brig. T. Sailo; Laldengate erawh eiruk thubuai lakah an fihlim niin a lang. Eirukna lakah an fihlim bik tihna erawh a ni lo; anmahni laka thubuai theh luttu an awm ve loh vang chauh a ni thei. Kum 2023, 9th General Assembly inthlana CM thar lo awmleh tur hian eiruk thubuai (Court Case) a nei veleh mai ang em? tih chu tuma sawi lawk theih a ni lo.
Eirukna hi chihrang hrang a awm: sum faia eiruk te, a bungruaa eiruk te, hun eiruk te, aikal lak eiruk te, mi thil rukte leh mimal pawisa eiruksakte leh a dang tam tak a awm thei. Ministry leh sorkar hnathawk chauh hi eiru thei an ni lo. NGO leh Kohhran chen hian eirukna hian min chim hneh hle. Kohhran puithiam (Reverent) pensioner pakhat ka zawhna -Kohhran hrang hrang atanga pastor pensioner thiau tawhte hian ministry hi chelh se a tha ber mai law’ng maw? tia ka zawhna min chhannaah chuan-“Mahni tlãkna kohhran mual hran te teah pawh eiru (corrupt) duh vek tho kan ni a, engtihna mah kan ni bik chuang lovang” a ti a. Tun thlengin he chhanna hi ka rilruah a thi thei lo. NGO hrang hrang zingah pawh eirukna hian zung a kaih nghet tawh êm a ni. Pawl, NGO lian leh tenau, kohhran hrang hrang buaina tawh fo chhan pawh eirukna vang a ni thin.

LANTLANGNA:
Lan tlangna (transparency) hi sorkar a thuruk leh hmalakna hrang hrang zepruk leh thup awm lova mipui hriata puan chhuah ringawt hi a ni lova, transparency-in a tum tak zawk chu kha hmalakna kha ruahman lãwk ang takin a that zawng (quality) leh a hlut zawng (value) bakah sum leh pai ruahman zat leh hun tiam (time bound) chhung ngeia peihfel a ni em? tih leh a nihdan tur ang thlapa siam leh saka hman tangkai a ni em? tih hi a phawk chhuak zawk tur a ni. Tuna kan awm danah hi chuan transparency a awm meuh lo niin a lang.
A bikin sorkar department hrang hranga contract hna bikah phei chuan transparency a awm lo hulhual a ni lawm ni? Contract hna pakhat mi pahnih pathumin an lei chhawn thin avangin plan & project (Draft Project Report) ang thlapa thawh zawha hman tlak hmuh tur a vang hle.

DEVELOPMENT:
Ram mipuite kawng hrang hranga tihthanna, tihhmasawnna (development) hi a rual khai tawk lo hle. Inthlan campaign lai chuan political party tinte hian ram leh khawtlang mipuite leh rethei chhumchhiate an hmangaih tlang thin hle. A tawpah tu party emaw berin sorkarna an han chelh a, mi zuan kahlen thei/development zuang thei, (Passover development system) hlir an kalpuileh thin a, mirethei chhumchhia leh eptu party bial mipuite’n chanvo engmah an chang pha ve tawh thin lova, “opposition MLA bial nih chu a hahthlak emai!” tiin an huileh piap piap thinte hian democracy hlutna leh rorelna dik a bawhbo hneh thin hle. Hetianga thlei bik neia rorelna leh kalhlen development hi Good governance-ah chuan a awm tur a ni lo.

DIKNA (INTEGRITY):
Dikna, thianghlimna, felna leh rinawmna (Integrity) hi a pawinawh hle. Tunhma khan ministry chelhtu politician-te zingah sorkar ram land least huam chhung hleh thena mahni mimal hminga LSC siamtir ching an awm nual nia sawi a awm thin. Chiang taka ka hriat thawi chu-Zirna in pakhata hotu pakhat chuan Revenue Department-ah redemarcation a dila institution ram a teh thattir rualin hmun thalai tak inhmun khawp zãn tur chu ama hminga LSC turin a lo tifel hman thuak a; man chhuah a nih tak avangin cancelled lehrghal a ni. Ani hian integrity a tlachham hle. Relkawng, airport, tuikhuah, kawngpui laih dawn apiangin politcian, sorkar miliian leh mipuite’n integrity kan tlachham thin hle a, thlarau LSC a tam thei hle niin a lang. Ka phak tawka ka kal kual vena chinah secret investigation atanga ka hmuh danin khawimaw lai laiah chuan NGO pawh hian Sorkar Department ram an hleh thensak thin niin sawi a awm bawk. Heng ang hi a awm tak tak a nih chuan integrity kan tlachham tlang hle tihna a ni thei ang. Hei vang hian development tha neih kawngah kan state a hnufum phah thin. Good governance chuan integrity a kengtel tlat tur a ni si a.

NUNDAN THA:
Nundan tha leh khawsak tha (ethics) nena hna thawh hi a pawimawh takzet. Ministers atanga hna hniam ber thleng hian kan nihna leh hnathawhna atan inkaihhruaina fel tak a awm. Inzahtawnna, inngaih pawimawh tawnnate hi thil tul tawp khawk a ni. Mahni hna kal sana pawimawh dang chhuanlam siam chin te, pisa leh mahni hna thawhna hmun (work place) chhuahsan sek te, minister, MLA, officer etc. pawimawh changa hmuh harsa lutuk khawpa khawsak chingte hian khawsak dan tha (ethical behavior) an tlachham hle a ni. Hetiang tlakchhamna hian tun thlengin kan ramah hmun a la awh zau hle. Good governance-ah chuan ethical behaviour dik tak a awm tur a ni.

DÃN LEH DUN THA:
Kawng hrang hrangah dãn leh dun (rules & regulations) Mizoram Gazette hnan thlap kan nei thain kan ngah tawh hle. Dãn leh dun anga kal erawh a harsa hle. Dãn leh dun siamtu leh kengkawhtuin dan leh dun an bawhchhe fo thin a, a thenah dãn leh dun khauh taka lek ching; a thenah ngai pawimawh leh si lo kan niin a lang. Hei hi mipuiin an hriat reng thin avangin dãn anga kal a harsat phah thin a ni. Sorkar hna lak dan thenkhatah leh Contract tender chungchangahte leh thil dang dangah pawh tun thlengin belhchian dãwl lo lai a awm fo thin. Dan leh dun ang thlapin huai takin kal ngam thin ila chuan hetiang thil hi a thleng thin lo tur a. Good governance-ah chuan Dãn leh dun palzutna a awm tur a ni si lo.

DÃN LEH THUPÊK:
India tluka dãn leh thupek nei tha leh nei chikim khawvel ram dangah an awm bik lo mai thei. A kenkawh lamah erawh a hlawhchham theih. Assam nena ramri buai kan hmachhawn mekahte leh covid-19 kan hmachhawn mekna kawngah pawh hian dãn & thupêk kenkawh kawngah kan hlawhchham em tih chu a hretute vek kan ni. A thena ruah sur, a thena ni sa ang maia a kal chuan Good governance kan ni lo tihna a ni.

RORELNA DIK:
Rorelna dik (justice) hi hleih nei lo, mi dikna chanvo ang taka rel felsakna hi a ni. Executive leh judiciary dah hran a ni tawh. Hetih rual hian thil thenkhatah chuan judiciary hi executive lam hian a la thunun deuh emaw tih theihin justice awm lo tak taka court thutlukna awm fote a awm thin ni awm taka sawi leh titi a awm thin. Police Department lamah pawh FIR register duh leh duh loh awm thin anga sawi a awm fo mai; kei chuan a dik leh dik loh chiah erawh ka hre ve lem lo. Rorêlna sai thinga chantîra, felna chu leia paih thlate u; (Amosa 5:7). tih hi kan dinhmun a ni ta zawk em ni? Nimahsela rorêlna dik chu lui angin luang sela, felna chu luipui kang ngai lo angin luang rawh se. (Amosa 5:24). Good governance-ah chuan rorelna dik tak a awm tur a ni.

TUM MUMAL:
Sorkar inrelbawlna tha chuan tum mumal leh felfai tak (sound policy) a nei tur a ni. Kan ramah Ministry thar a pian apiangin tum mumal, flagship programme leh programme tenau dang dang tha tak tak an chhawp chhuak thin. Mahse, an tihfuh thin loh nia lang chu an theihna (ability) piah lam thleng thlenga mipui hnena thil tiamkam an nei thin hi anmahni tichhetu a ni tih an man pha lo nge? Mipui rin an kai tawh loh phah thin. An sorkar tawh loh hnuah erawh an inhmuchhuak tharleh ziah lawi si a nih hmel. Kan politician-te zingah hetianga intiamkam ching, a tak hmuh tur awmleh tak tak si lo a awm fo thin avang hian mioui rin an kai tawwh loh phah thin a ni. Intiamkamna tawngkam, tihhlawhtlin leh tak tak theih si lohte hi ram mipuite beidawnna thlentu a ni. Hetiang sound policy ang taka lang, a tak changleh thei ta si lote hian social media hrang hrangah kan ram hruaitute zahpahna nei lek lova na tak taka demletna leh chirhthehna a thlen thin a; kan ram hruaitute zahawmna a tichhe vek a; kan ram leh hnam hmel a tichhe takzet thin. Good governance-ah chuan inbumna a awm tur a ni si lo.

A TLANGKAWMNA:
Good governance awmzia kan hre chiang ta. Tehna (criteria) tam takah good governance ni phak tawh mah ila kawng tam takah erawh kan la hlat hle. Covid-19 hripui hi hlauhawm hle mah se, a bikin pisa hna thawh danah hian nghawng tha tak a nei tlat. Pisa dawr kawnga kawng kikawi kual tak tak (zigzag road), British-ho intihlalna tha lo tak, tun thlenga kan la chhawm nun, hna muang chia (lengthy procedure) hi thlak thlengin a kawng tawi leh awlsam zawngin a tih tan theih ta a, hetiang New Normal Office of Procedure (NNOP) hi a taka kalpui hlen theih ni se, good governance tihhlawhtlingtu tha tak pakhat a ni ngei ang.
Khing tarlan takte baka good governance hlawhtlinna tura pawimawh ber chu mimal, chhungkua, khawtlang, hnam (personal, family, social, culture reformation) insiamthat hi a ni. Heng hi kan reform phawt loh chuan good governance dik tak kan nei thei lovang. Chuvangin, good governance nei turin mahni, chhungkua, khawtlang, ram leh hnam insiamtha chung zelin theihtawp i chhuah zel ang u.

NB: Article hi keima tawnhriat leh ngaihdan public inerest atana ka ziah a ni e. (See-Article 19(1)(a) of the Constitution of India & CCS rules 8(3)).

Leave a Reply

Your email address will not be published. Required fields are marked *

error: Content is protected !!