Vawiin atangin rin ngam zawk nih i zel tum ang u
MNF in sorkarna an chelh hnuah bye-election kan nei ta nawlh nawlh mai a, bye-election hi rorellai party chan tura ngaih deuh a nih thin avangin party dang tan beisei a sang lo thin hle. Tun hnaia bye-election erawh a dan a dang deuhin a lang a, party dang tan tlin theihna chance a tha ve hle in a lang a, bial pakhatah phei chuan eptu lam candidate in hnehna a chang ta hial reng a nih kha.
Tuirial bial inthlanah pawh party dangin tlin theihna an nei sang hle in a lang a, beiseina pawh an nei sang hle. Mipui lam kohkhawm kawngah pawh en mai chuan an inbeitawk viauin a lang reng a ni. Mahse, nimina result tihchhuah takah erawh rorellai MNF candidate bawkin hnehna changin, MLA an neih belh leh dawn ta a ni a, an lawmpuiawm hle.
Party hrang hrangin intiamna leh tihtur hrang hrang an tuk nasa hle a, tun hnaia bye-election neih tawhnaah chuan inbeihna nasa pawl tak a ni pawhin a rinawm. Candidate tling zo ta lote pawhin engtiang chiahin nge an vilzui dawn tih vawiin atangin a hriat tan ang a, kum 2023 inthlana chuh an la tum zel a nih phei chuan a hma aia an tan lehzual pawh a ngai ngei ang.
Mipuite pawhin party hrang hrang kalphung leh inher dan kan hre chho zel a, beiseina siam thiam erawh a la har hle. Bye-election result atanga innghah ngawt erawh a fuhin a rinawm loh a, Tuirial bial atanga inzir chungin party tinte pawhin an chak lohna lai leh mipui an huikhawm tam a, an pawl mi leh sa an siam ngheh thiam sauh sauh pawh a tul awm e.
Tuirial biala tling zo ta lote pawhin beiseina thar nei chungin an chak lohna pawm thiam se, an hun tawn mila insiamrem zir chungin, bial tana tha zawk leh rin ngam zawk nih ngei tum turin tun atangin tan la lehzual nghal mawlh teh se.