Tuirial inthlanah hneh takin MNF candidate thlan tlin a ni


October 30, 2021-a Tuirial bial assembly bye-election a vote tlate chu nimin khan chhiar a ni ta a, rorel lai MNF candidate K Laldawngliana chu hneh taka thlan tlin a ni. Amah hnaih bertu, ZPM candidate Laltlanmawia chu vote 1,284-in a hneh.
Kumin August 17-a Tuirial bialtu MLA Andrew H Thangliana a boral avangin October 30 khan bye-election hi neiin mipuiten vote an thlak a. Vote tlate hi nimin zing dar 8 a\angin Govt Kolasib College-a counting hall-ah chhiar niin, rorel lai, MNF candidate K Laldawngliana’n vote 5,820 hmuin, amah hnaih bertu, ZPM candidate Laltlanmawia hian vote 4,536 a hmu a. K Laldawngliana a phak lohna hi vote 1,284 a ni.
He inthlana pathumna, Indian National Congress (INC) candidate Chalrosanga Ralte chuan vote 3,927 a hmu a, BJP candidate K Laldinthara’n dawtin vote 246 a hmuin, NOTA vote hi 61 a awm bawk.
Tuirial constituency chhungah hian polling station 27 awmin vote nei 17,911 an awm a. Tun \um bye-election-ah hian vote 14,561 (81.29%) a tla.
MNF candidate thlan tlin tak, K Laldawngliana hian polling station 21-ah hnehna changin, ZPM candidate Laltlanmawia’n polling station pathumah, INC hian polling station pahnihah hnehna a chang a. Kawnpui II Polling Station-ah MNF leh ZPM hian vote hmuh zat a intluk thung.
Kum 2018 MLA inthlan khan Andrew H Thangliana hian vote 4,387 hmua hnehna a chanpui laiin, tun tum bye-election-a thlan tlin tak, K Laldawngliana aiin vote 1,433 laiin a hmu hniam zawk a, he biala inhnehna san ber \um a ni bawk.
Mizoram state assembly inthlan hmasa ber, February 16, 1987-a neihah Tuirial bial hi Kawnpui bial tih a la ni a. MNF party hian an lo la tawh a. Hemi \um hian vote 9,422 awmah vote 7,383 tlain, candidate zingah independent-in Lalkhawnghinga hi thlan tlin a ni a, a hnuah MNF a zawm leh a ni.
Kum 1998-a assembly inthlanah he bial hi MNF-in lain, Sanghmingthanga Pautu thlan tlin a ni. MLA bial siam rem hnu, Tuirial bial a nih hnuah erawh tun \um hi MNF party-in an lak vawi khatna a ni.

Leave a Reply

Your email address will not be published. Required fields are marked *

error: Content is protected !!