Punjab chief minister hlui, Captain Amarinder Singh chuan Thawhtanni khan Congress chief Sonia Gandhi hnenah party atanga a bânna a thehlut ta a. A political party thar tur, Punjab Lok Congress a din tih a puang nghal bawk.
Singh-an Gandhi-i hnena lehkha a thawn, phek sariha seiah hi party chhunga innghirnghona neuh neuh awm avanga chief minister atanga a bân hnu leh, party a chhuahsan nghal dawn em tih zawhna a awm reng laiin Congress party chu a chhuahsan dawn ta tih a tichiang ta a ni.
Congress nen hian a hnu lamah an indawr zui nia sawina awm erawh a pha thung.
“Congress nena indawr zui anga sawina hi a dik lo va, tunah chuan khatiang boruak kha a reh ta. Ngun taka vawi tam ngaihtuah a nih hnuah party nen kan inthenna chu tihtluk a ni ta a. Congress president Pi Sonia Gandhi-in min thlawpnaah lawm thu ka sawi a; mahse, Congress-ah chuan ka awm tawh dawn lo a ni,” tiin a sawi tih a media advisor, Raveen Thukral chuan Twitter-ah Inrinni khan a lo tar lansak tawh bawk.
Social media-a hetiang tar lan a nih hnuah hian chanchinbu thenkhat chuan Singh-a hi Congress hruaitu lawk tak takten biain an party-a awm zui turin an thlem leh mek niin an tar lang a ni.
Kar hmasa khan Singh-a hian political party thar a din dawn thu a lo sawi tawh a, Election Commission-a tul a buaipui a fela an symbol tur an tihfel veleh a din tur thu a puang a. Nakuma Punjab assembly inthlan turah bial 117 an chuh dawn thu a sawi bawk.