Nupaa an insiamphat atanga neuh neuh leh beuh beuh ngah nghal an ni a, inngaihzawn lai atang tawha daih rei lo tura ngaih an ni. Mahse, Justin Bieber leh Hailey Baldwin te hian nupa kara chonna tam tak awm te chu heti ang hian an hmachhawn.
In Good Faith with Chelsea & Judah Smith podcast tharah, “Thil tam tak kan sawi dun a, ngaihtuah dun lah kan ngah, ‘Engnge kan tum ni a, engnge thlen kan tum,’ tihte hi a langsar. Nupaa insiam reng kan duh a, fate nena chhungkaw duhawm tak din ngei kan tum ruh hle bawk,” a ti.
Anni pahnih hi September 2018 khan an innei a, an ruahman dan chuan kumin kumtawp lama fa neih, tih a ni a, an hlenchhuak dawn em hriat a ni lo.
Nupa kawpchawi inngeih tak nih reng chu thil awl-ai lo tak a ni a, rilru lama harsatna a neih atang phei chuan JB tan a harsa lehzual. “Ka nunah hian thil tam tak ka tawng a, mellung pawimawh te phunin, khawvel ka fang a, thil tam tak ka hmu. Mahse, ka khua a har ngawih ngawih thin a, engmah ti peih lova, hne ngawih ngawih nun kha a tam thin.
“Hrisel taka nun hman a, inlaichinna duhawm nei tur erawh chuan khawi lai hmunah emaw kal ngei a ngai tih ka hrechiang em em a, rilruhahna bakah ka nunah ser tam tak a awm hman. Hei vang hian nun thar nei a, siamthar lehna chang turin theihtawp ka chhuah nasa hle a ni,” a ti bawk.
Kum 2019 tir lam khan rilru lama harsatna a neih chuan a vaw chau viau tawh a, hemi hmalam kum hnih chhung velzet depression nasa takin a tlak buak avangin Purpose world tour chu laklawh takin a titawp hial a ni.
JB chuan, “Vanneihthlak takin, Hailey hian ka nihna ang angin min pawm a. Kan inneih hnu pawh khan tlakbalna tam tak a la awm reng a, rilrunatna thlengin a bang lo. Chuvang chuan, keima lam atanga tanlak thar zel hi a ngai a ni,” tiin a sawi.
Hailey pawhin a pasal laka rilru zau tak puin, hriatthiamna thui tak a kalpui a ngai fo. “Thutlukna ka siam tawh a, ka vawn ngheh reng a ngai. Hun rei tak atang tawhin ka hma-ngaih a, beidawng tur ka ni lo. A lakah hian ka beidawng ngai lovang,” a ti ve bawk