Tuirial bial bye-election neih zawh taka Indian National Congress (INC) ticket-a ding, Chalrosanga Ralte (Mavala) chuan amah thlawp tute hnenah lawmthu sawina hun hmangin khaw hrang hrang a tlawh.
Nimin khan MPCC Secretary Chalrosanga Ralte hian Tuirial bial chhunga khaw \henkhat tlawh kualnaah Congress party mite leh amah thlawptute hmaah Tuirial bial bye-election tluang taka neih a ni chu lawmawm a tih thu sawiin, “Tling zo ta lo mah ila, lawmna tur tam tak ka neiin ka hria,” a ti.
Mavala chuan, “Tuirial bial hi ZPM bial mek a ni a, MNF sorkar vanglai tak a la nih bawk avangin kan tan a harsa a. Hniam taka bul \anin theihtawp kan chhuah na a, kan dinhmunin a la zir ngang lo a ni ber e. Kan vote hmuh dan en chuan he bialah hian Congress party hi nghet takin a ding reng a, vote 4,000 dawn kan hmu thei hian kan tlahniam chuang lo tih a lang chiang hle a. Kum 2018 inthlan aia vote kan hmu tam zawk kha hmasawnnaah ka ngai,” a ti.
Duhsak taka amah vote-tu leh theihtawp chhuahtu Congress party mite chungah lawmthu sawiin, Tuirial bialah hian bul a \an chauh nia a inngaih thu leh beidawng mai lova theihtawp chhuah chhunzawm zel a tum thu a sawi bawk.
November 2, 2021 chhun lamah Thingdawl-ah hun hmangin, zanah Bualpuiah hun a hmang leh a. Nimin khan Kawnpui leh Hortoki tlawh lehin, vawiin hian Lungdaiah hun a hmang leh dawn a ni.