Hnahthial SP Lalbiakkila’n Myanmar ram buai avanga Mizoram beltu, Hnahthial district chhung khaw hrang hranga awmte hnenah India dan leh hriat tur \ul pawimawhte zirtirna hun an buatsaih tih a sawi.
Hnahthial SP chuan Myanmar raltlan, Hnahthial district chhung – Ngharchhip, New Ngharchhip, Bualpui H, Cherhlun, Thingsai, Tarpho leh Khawhri-a Refugee camp-ah India ram dan leh hrai leh thupek te, a bikin IPC, CrPC, MV Act leh hmeichhia leh naupang humhalhna dan hrilh leh zirtirna hun an buatsaih tawh thu a sawi a. Raltlante chu India rama an awm chhungin thlamuang taka awm tur leh India dan leh thupekte zawm tura an hrilh thu a sawi.
Hnahthial khawpui chhunga Myanmar raltlan awm te pawh India dan leh hriattur \ul hrang hrang te an hrilhhriat tawh thu Hnahthial SP chuan a sawi a. Hri leng laka himna tura hmanraw pawimawh facemask leh sanitizer te pawh raltlan te hnena an sem thu a sawi bawk.
Hnahthial bawrhsap pisa-in a chhinchhiah danin Myanmar ram buai avanga sahimna zawnga Hnahthial district chhunga luh belh nimin khan mi 4 an awm a, an ram lama kir leh mi 43 an awm bawk.
Hnahthial district-ah hian Myanmar raltlan mi 2310 an awm mek a, an zingah hian chhungkaw 418 an tel. Khaw hrang hrang 12-ah raltlan te hi an lut a, Thingsaiah 903; Cherhlunah 185; Bualpui ‘H’-ah 155; Ngharchhip-ah 169; New Ngharchhip-ah 456; Tarpho-ah 67; South Chawngtui-ah 25; Khawhri-ah 62; Tuipui ‘D’-ah 35, South Vanlaiphai-ah 8; Aithur-ah 14; Leite-ah 11 leh Hnahthial-ah 228 an awm mek bawk a ni.