WHO-in EUL atan India vaccine siam, Covaxin a pawm ta


World Health Organization chuan Nilaini khan Covaxin chu emergency use listing (EUL) atan a pawm ve ta a. Heti a nih tak avang hian India-in a siam Covid vaccine hi ram dang leh ram danga Indian zin, a hmangtute chu inkhung hran emaw, zin phal loh emaw a ngai tawh dawn lo a ni.
Covaxin hi puitling kum 18 chin chung lam tan, chawlhkar li dana vawi hnih lak chi invenna a ni.
A damdawi hi naupang tana hman tura tihna a la awm lo va, nu, nau pai mek tan a him leh him loh hriat theih a la ni lo bawk.
“WHO hnena vaccine hman tlak leh tlak loh rawtna thlentu, Technical Advisory Group chuan Covaxin hian \ha tawkin COVID-19 lakah mi a veng thei,” tiin khawvel huap pawl chuan thuchhuah a siamah a tar lang.
“WHO chuan emergency use listing (EUL)-ah COVAXIN (Bharat Biotech-in a siam) chu Covid-19 laka invenna atana hman atan a telh,” tiin Twitter-ah pawh tar lan a ni.
Union Health Minister Mansukh Mandaviya pawhin WHO hnenah lawm thu a sawina a tar lang ve bawk.
Covaxin hian Delta variant pawh 65.2% zet a veng thei niin zirchiannaah hmuh a ni.
WHO hian emergency-a hman tura Covishield leh Covaxin a pawm tawh bakah Pfizer, Johnson & Johnson-Janssen, Moderna leh China-in a siam, Sinopharm te chu a lo pawm tawh bawk.
EUL-a tel tura Covaxin kawng zawh hi a thuiin a hle a. A siamtu, Bharat Biotech hian April thla daih tawh khan dilna thehlutin July 6-ah a damdawi chungchanga thil pawimawh (data) an thehlut a. A him dan, a thawh dan leh a rintlak dan tar lan a ni.
Pawm mai a nih loh avang hian ram pawn lama Indian zirlai, hna thawk leh chhungkaw tam tak, let leh duh leh India-a haw duh tam tak an tangkhan phah.
WHO-in a la pawm loh avang hian a damdawi hmang Indian tam tak chu ram danga an zinin an thlenah anmahni suma khung hran an la ngai a, anmahni sum vekin inendik leh pawm tawh vaccine lak nawn a ngai thin bawk.
Kar hmasa khan Technical Advisory Group chuan data an mamawh belh thu sawi lehin a hnu lawkah WHO thupuangtu, Dr Margaret Harris chuan hun reilo teah pawm a ni tawh dawn tih a sawi a, a sawi ang ngeiin Nilaini khan pawm a nih thu chhuah a ni ta a ni.

Leave a Reply

Your email address will not be published. Required fields are marked *

error: Content is protected !!