India captain hlui Rahul Dravid chu head coach ni lai Ravi Shastri thlaktu atan lakluh a ni dawn.
Kum 48 mi Dravid hian tun T20 World Cup zawh atangin India team hi a enkawl dawn a. Inelna huang thumah India coach nihna a chelh vek dawn a, a hova an inkhel hmasa ber ni turin November leh December thla chhungin New Zealand an tlawh ang.
Kum 59 mi India all-rounder hlui Shastri hian kum 2017 khan India team hi a enkawl tan a, a contract neihlai chu tun T20 World Cup zawh hian a tawp dawn.
Dravid chuan, “India head coach nih hi ka tan chawimawina lian tak a ni a. Tun kum hnih chhungin inelna lian khelh tur a awm nual a, kan theihna tak tak heng hunah hian kan pholan theihnan player leh kan thawhpui dangte nena theihtawp a hnathawh hlan ka nghakhlel tawh.” tiin a sawi.
Nakkum October leh November-ah Australia-ah Men’s T20 World Cup khelh a ni dawn a. Kum 2023-ah India in Men’s 50-over World Cup an thleng dawn bawk.