Tun kartawp a UFC 268 a Michael Chandler nen inhmachhawn tur Justin Gaethje chuan hnehna a chang a nih chuan UFC lightweight title chuh a inbeisei tih a sawi.
Madison Square Garden-ah Pathianni zingah Gaethje leh Chandler te hi an inhmachhawn dawn a. No. 2 rank lightweight ni lai hian no. 4 rank Chandler hi a hneh chuan Charles Oliveira leh Dustin Poirier intum tura chak zawk hmachhawn a beisei.
“Ka chak a, title min chuh tir lo a nih chuan ka lakah thil dik lo an ti a ni ang. Ka huntha hi ka bawhpelh dawn lo.” a ti.
Champion lai Oliveira leh Poirier te hi December thla hian UFC 269-ah an intum dawn.
Kum 32 mi Gaethje hian nikum October thla khan a zawna vawi li chak lai niin Khabib Nurmagomedov a hmachhawn a. Hemi tum hian round hnihnaah submission hmangin a tlawm.
Lightweight a ngaihnawm
UFC 254 a Nurmagomedov a chawlh hnuah Chandler leh Oliveira te title ruak inchuh tir an ni a. A chuh turin Poirier hi Conor McGregor a zawna hnehtu a ni mek.
Gaethje hi title inchuhnaah a buk la rit mahse Bellator champion vawi thum ni thei Chandler a awm ve avangin a kawng a inhawng vek bik lova. Kumina lightweight a che tha ber, a zawna vawi 9 chak lai ni mek Islam Makhachev chu title chuh phu niin tam takin an ngai.