Raltlante naktuk hun tur hi
- Mahmuaka Chhakchhuak
Myanmar rama sipai thuneihna avanga nunauin harsatna an tawh avangin Mizorama raltlan rawn lut chu nitin awm belh zelin tunah hian Education Department lamin an record dan chuan Champhai District-ah raltlante zingah mi 579, Lawngtlai District-ah mi 539 leh Hnahthial District-ah mi 327 te chu School naupang an awm a. Heng bakah hian Myanmar ram atanga raltlan rawn lutte hi Oct. 21, 2021 report-a kan hmuh danin; Aizawl District ah 1622, Lunglei District ah 237, Lawngtlai District ah 3022, Siaha District ah 1362 leh Hnahthial District ah 2244 awmin Oct. 19, 2021 report-a kan hmun danin Champhai District ah mi 5795 an awm bawk a, an vai hian mi 14,282 niin chhinchhiah loh mi sang chuang an awm bawk nia sawi a ni. Heng bakah hian rawn la lut belh leh zel tura ngaih a ni bawkin, Myanmar ramah remna leh muanna ala awm mai rih hmel siloh avang hian kan unaute chhawmdawlna kawngah Tlawmngai pawl hrang hrang mai bakah Political party leh kohhrante ngei pawhin anmahni chhawmdawlna lam buaipui hian kan la chawl mai thei rih dawn lo niin a lang.
Kan theih ang anga kan unaute hi kan chhawmdawl a pawimawhin a tha hle mai a, Central sorkarin raltlan angin la dawngsawng thei rih loh mahsela ‘kan unaute’ an nihna avang zawka keiniin hetianga kan lo dawngsawng hi kan tih tur tak ni pawhin a hriat a, a lawmawm hle a ni. Chutih lai erawh chuan tun ang renga kan lo dawnsawn a, mi tlawmngai leh thilphalte chhawmdawlna pek ring ringawt tura kan awm tir reng chu a fuh chiah lo mai thei a, hei aia tha zawk ruahmanna kan siam a tul dawn hle in a hriat a. Chumi atan chuan hetiang hian rawtna ang deuhin ruahmanna han siam chhin ila;
RAMRI HRULA AWM TIR: Kan chenna kiangah hmun awl a tam tawh loh avangin leh kawng hrang hranga a bika enkawl an la ngaih dawn avang hian ramri hrula awm tir hi a remchang viauin a hriat a. Ramri hrula awmtir hi anmahni duhsaklohna leh eng emaw thil dang vang pawh niloin khawvel hmun dangah pawh tihdan pangngai a ni. Israel ramah ngei pawh vawiin thlenga an la kalpui dan a niin kan thenawm Assam State ngei pawhin Mizoram hnaih lamah a nih hi Bangladeshis ho an dah bawk ni. Kolasib District, Mamit District, Lawngtlai District leh Lunglei Districtahte hian ramri hnaih lamah ram awl luah loh engemawzat a awmin hengah hian a area DC te’n uluk taka vilin In leh lo an dinna turin sum leh pai ngaihtuah sak sela, a thlawn ngawta pe loin a pung tlemte awma puk tir ni sela. Inchung tur rangva te chu a thlawna pek theih a nih phei chuan a lawmawm ngawt ang. Thingsai khua hi In 500 vel an awm mek a, mihring cheng hi 2400 velah lo ngai bawk ila. Chutiang chuan raltlan mi 900 vel enkawl chu hautak tham tak tur a ni. Thingsai ang bawk hian khaw hrang hrangah kan unau raltlante hian nunphung a tihbuai mek leh khawtlang hruaitute rilru a tih hahna hi an awm nualin a rinawm a, Myanmar lam atangin kan unau rawn lut an la awm reng bawk si nen hian nakin lawkah phurrit lian tak ala thleng theiin a rinawm a ni. Hei hi hmangaih loh vang a ni lo a, anmahni tan ngei pawha tha zawk tur nia hriat a ni.
EIZAWNNA KAWNG SIAMSAK: Kan unau raltlan rawn lutte hian an nunna humhim duh avangin engkim kalsanin an rawn lut a, keiniin kan theih ang anga thawmhnaw leh ei tur leh sum leh paite nena kan lo chhawmdawl hi a lawmawm em em rualin hetiang reng hi a remchan theih reng dawn loh avangin anmahnia eizawnna an neih theihna turin kawng kan sial sak a pawimawh a ni. Ramri hrul lama District thuneitute leh VC te remtihpuinaa In leh lo an neih a, awmhmun an benbel chuan thlamuang takin eizawnna kawng pawh an zawh thei turah ngai ila, kuthnathawh lam emaw anmahni thiam zawng thildang pawh nisela chung atang sum leh pai an thawhchhuah theihna turin kan sorkar hian a bul tanna turin ruahmanna siam sela a tha ngawtin a rinawm.
Chumi tur chuan a bik takin an awmna, In leh lo an neihna DC te remtihnain Village Councilte’n an huamchhungah chhungkaw tin tana eizawnna bul an tan theihna turin temporary pass angin ram enkawl tur pe sela. Tin, Refugee ID siam ngei pawh a tul ang a, kum hnih atan emaw siamin document pawimawh dangte pawh keimahni ang bawkin a theih chen chen siam sak ni bawkin an awmna sawn emaw an pem apiangin pem lehkhate pawh siamsak zel ni bawk sela, khawpuiah emaw hmun dangah pawh inhlawh an lo duh pawhin engmah harsatna a awm lohna atan a pawimawh a ni.
ZIRNA IN PAWH DIN ZELIN: Chutianga ramri hnaih lama chhungkaw 20 – 40 inkar emawte awmna hmunah chuan kan sorkarin naupangte tan zirna In hawng thei zel bawkin regular emaw part time angin zirtirtu pawh anni tan hian lak ni bawk sela. A bik takin Anganwadi phei chu In 20 danah pakhat zel ang tal awm tir theih nisela a tha ngawt ang. Primary School leh Middle School pawh ngei ngeia dah ngai a ni bawk ang a, tuna mi 1735 vel an zing atanga zirlai kan neih ang hian kan sorkar hian hmangaih taka a tuamhlawma a enkawl a tha hle a ni.
Hetiang hian point thum lekin Myanmar atanga kan unau rawn lutte enkawl dan tur kan han sawi chhin a, hei aia tha zawk pawh hi ala awm thei bawk a. Heng kan han sawi takte hi a chhan ber chu raltlante naktuk hun tur hi kan thlirpui a ngai hle mai a, kan kuta an awm tak rau rauah chuan kan ngaihtuah a ngai tihna a ni a. An rawn chhuahna Myanmar ramah hian boruak muanawm tak pawh awm mahsela kir chho an awm bawk rualin thenkhatte hi chu an kir chho leh duh tawh lo mai thei bawk a, kan hnena awm reng duh tawh zawk an ni thei. An tan chuan Mizoram hi Jerusalem a nih tlat avangin tuna mi 14,662 vel emaw awm mekte hi chhawmdawlna nen emaw ringawt chuan kan awmpui reng theih dawn siloh avangin hetiang hian ruahmanna kan han siam chhin a. Thil pawimawh tak pakhat awm chu tunlai hian khawchhak lam atangin ruihhlo chi hrang hrang a rawn lutin hmun thenkhatahte phei chuan thihna hial pawh a thleng bawk a, hengte hi kan unau raltlante vang a ni e tih ni chiah loh mahsela misualin remchanga an lo hman theih avangin tuna kan kalphung pangngai hi chuan min zawh loh chin ala nei thuaiin a rinawm a, keimahni zawk hian kan la buai phah zawk pawh a hlauhawm a ni.