Real Madrid tan striker Karim Benzema chuan a hna a thawk chawl lova. Shakhtar Donetsk lakah goal hnih khungin 2-1 in a team hnehna a chanpui a. Group D-ah hmahruaitu an ni mek.
Santiago Bernabeu-ah France striker hian minute 14-naah an goal hmahruai a khung a. Hei hi mikhual team in Fernando hmangin an sut hnuah minute 61-naah an chakna goal a khung ve leh.
Benzema goal hmasa zawk hi Real Madrid tan mellung pawimawh a ni a. Europe huap inelna a goal 1000 an khungna niin European football club zinga hetiang ti thei hmasa ber a ni a. France international hi inkhel tluan thei lo mahse a chhuah chhan chu inhliam ni lovin a taksa chau tawh vang a nih thu a sawi.
“Inkhel a hautak a, Shakhtar hi team tha an ni. Mahse kan tangrual a, hnehna chang turin a huhovin kan sual tlat a, kan chak ta a ni. Hetiang chak a ngaih chang hi a awm thin.”
“Kan inkhelh hmasak zawk angin football hlauhawm kan khel lo. Ni thum danah kan inkhel a, hei hi a hautak zual, inkhel paiwmawh vek a nih avangin a khelhthat reng theih thin loh.” tiin Benzema chuan a sawi.
Madrid boss Carlo Ancelotti chuan, “Goal hmasa kan khung zawh khan huaisen zawka kan khelh a ngai a ball kan hman thiam a ngai bawk. Goal hnihna kan khung hnuah inkhel kaihhruai kan tum a, chuvangin kan inthlak kual. Karim a chauh tawh avangin Luka Jovic ka dah lut a, kan inrem dan thlak lutuk kha ka duh lo. Carvajal khan a tlin ngang loh ka hlauh avangin Nacho kha ka dahlut bawk.” a ti ve bawk.
Group a pahnihna ni turin Inter Milan in an football tha an khel a, Sheriff Tiraspol lakah 3-1 in an chak.
Bolshaya Sportivnaya Arena-ah Internazionale in first half-ah goal-ah vawi 14 chance nei mahse an khung lo vek a. Second half-ah erawh Marcelo Brozovic-a’n goal a khung hnuah Milan Skriniar leh Alexis Sánchez ten goal an khung belh.
Tun season a vawikhatna atana Champions League khel Sheriff tan Adama Malouda Traoré chuan goal a khung ve bawk.