UCL Group B : Liverpool aia sang tur an awm lo

UEFA Champions League-ah Liverpool chu dan theih lohin an kal vung hle a. Nilaini zanah player 10 a inkhel zo Atletico Madrid lakah 2-0 in hnehna an chang a, Group B atangin hmahruaitu niin round of 16 an khel dawn.

Anfield-ah Liverpool tan inkhel tan tir lamah Diogo Jota leh Sadio Mane ten goal an khung a. Full-back Trent Alexander-Arnold chuan an goal khung tur siamsak ve ve in Reds hian inkhel hi an kaihruai tluan a. First half a Felipe hnawhchhuah a nih hnuah Spanish club tan thawh leh ngaihna a awm tawh lo.

Jurgen Klopp-a pawlte hian second half-ah tam zawk an nihna a lang a, mahse goal khung belhna remchang an neih an chhawr tangkai thei lo fo. Jota goal khung belh chu video assistant referee hmanga endik niin pawm a ni lova.

Atletico in goal khat an khung ve bawk a, mahse Liverpool striker hlui Luis Suarez goal khung chu offside avanga pawm a ni lo.

Reds hian knockout stage hahdam thei ang bera an tlin bakah tun season-ah khelh 16 atangin tlawm lovin hun an la hmang chho ngat ngat a. April 6 atangin match 25 chhungin tlawm hmel an hmu tawh lo.

Liverpool manager Jurgen Klopp chuan, “Kan inkhel kha duhthu a sam teuhin ka hria, a bikin second half-ah. Inhliam avangin Roberto Firmino kan chan a, goal khung belh kha entu mipuiin beisei mahse kan thei lo, chance erawh kan ngah hle.” tiin an inkhel a thlirlet.

Group B inkhel dangah AC Milan leh FC Porto 1-1 in an inhnehtawk a, Rossoneri in khelh li atanga point an hmuh hmasak ber niin group stage atangin an dinhmun a hmawr.

San Siro-ah Luis Diaz chuan Porto tan goal a khung nghal thuai a, mahse Chancel Mbemba own goal vangin Milan an him hram.

Leave a Reply

Your email address will not be published. Required fields are marked *

error: Content is protected !!