UCL Group C-ah Ajax la chak vek, last 16 atan an tling

Dutch champion Ajax Amsterdam in Europe a club inelna lian berah a zawna vawi li nan hnehna an chang a. Player 10 a inkhel hmang zo Borussia Dortmund 3-1 a hnehin Champions League Group C atangin knockout stage khel turin an tling.

Westfalenstadion-ah Dortmund hian first half-ah penalty atangin goal an khung a, mahse darkar khat chuan tlem zawk ni chunga an khelh a ngai a, defender Mats Hummels chu minute 29-naah hnawhchhuah a ni.

Ajax tan Brazilian winger Antony chu a langar berah a tang a, an goal thum khung tur a siamsak vek niin Hummels hnawhchhuah a nih chhan lian tak a ni a. Hummels-a’n a foul nia a lanlaiin replay-ah a khawih fuh lo tih a lang a. VAR hmanga ennawn a nih hnuah German defender hnawhchhuah a ni ta tho.

Tlem zawk an nih hnuah Dortmund in goal an khung hmasa a, Ajax full back Noussair Mazraoui chuan Jude Bellingham lakah penalty a chawi a, Marco Reus-a’n goal-ah a chantir.

Amsterdam a 4-0 a tlawm tawh Dortmund hian an top scorer Erling Haaland chhawr thei lo mahse tlawm loh an tum ruh hle a, mahse an tlem zawkna chu a tawp dawn lamah langin Ajax in minute 21 chhungin goal thum an khung a. Minute 72-naah Dusan Tadic chuan bul tanin minute 83-na leh 93-naah Sebastian Haller leh Davy Klaassen ten an khung belh.

Inkhel zawhah Ajax coach Erik Ten Hag chuan, “Europe a team lian berte ti luhaitu hi nih kan duh. He inelnaah hian rinkai kan ni kan tihna a ni hauh lo, mahse tuman knockout stage-ah hian Ajax hmachhawn an chak kher lovang.” tiin an tlin hnuah a sawi.

Group C inkhel lehlamah Sporting Lisbon in 4-0 in an mikhual Besiktas an hneh a. An midfielder chhuanvawr Pedro Goncalves chuan goal hnih khungin Paulinho leh Pablo Sarabia ten goal dang an khung a. Sporting leh Dortmund te hi Lisbon-ah an inkhel leh dawn a, anni pahnih zinga pakhatin Ajax hnung hi an group atangin an zui ang.

Leave a Reply

Your email address will not be published. Required fields are marked *

error: Content is protected !!