Bihar hmun hniha zu chhia ngei nia hriat in vanga thi chu mi 23 an tling ta.
Zirtawpniah khan mi pariat thi lehin an zinga paruk hi West Champaran-a mi leh pahnih hi Gopalganj district-a mite an ni.
Hmun hniha thil thlengah hian mi 24 man tawh niin mi panga hren an ni a. Police pali suspend an ni tawh a, pahnih ve ve hi district pahniha mite an ni.
Thuneitute chuan Diwali laia thil thlengah hian West Champaran leh Gopalganj-ah hian mi 12 leh 11 an thi tawh tih an sawi.
West Champaran Superintendent of Police (SP) Upendra Nath Verma chuan an district-ah mi paruk an thih leh thu a sawi.
“Post-mortem report kan nghak mek a. Hetia a lan dan maiah chuan heng mite hian thil tha lo tak an ei/in niin a lang,” a ti.
Verma chuan mi 10 dang, zu chhia in ni ngeia hriatte chu enkawl mek an ni tih a sawi a. Gopalganj-ah hian mi pali dinhmun tha lo tak enkawl an la ni bawk.
SP chuan West Champaran-ah hian station house officer (SHO) leh chowkidar suspend an nih thu a sawi.
Mukul Parimal Pandey, sub divisional police officer (SDPO), Bettiah (sadar) chuan hmeichhia pahnih telin mi pali an ni a. Mi dang panga an hreng bawk tih a sawi.
“Kan chhui zui zel a, man belh pawh an la awm ang,” a ti.
Bihar-ah hian April, 2016 atang khan zu zawrh leh in khap a ni.
Hetih lai hian July hnu lama West Champaran-a zu chhe in vanga chhiatna a thlen vawi hnihna a ni a. July khan Lauriya leh Ramnagar block-ah zu chhe in vangin mi 16 vel thiin mi paliin an mit a del phah,
Gopalganj-ah hian Kushar khuaa mi eng emaw zatin mitvai, lu na, luak leh khaw hmuh fiah lo an neih thu an sawi a. Gopalganj leh Motihari district-a damdawi inah dah luh an ni.
“Mohammadpur SHO Shashi Ranjan Kumar leh chowkidar suspended an ni,” tiin SP Anand Kumar chuan a sawi a. Mi 20 an man bawk.
Gopalganj police leh excise department chuan hmun 63 an dapnaah rakzu leh Indian made foreign liquor (IMFL) litre 572 an man zui bawk.