Mizoram sorkarin Lungleia RT-PCR Laboratory bun turin hma a la mek a, laboratory-a duty tur staff-te pawh ZMC-ah training thuai tura ruahmanna siam a ni.
Nimin khan Lunglei HPC Vice Chairman Lawmawma Tochhawnga hovin Lungleia RT-PCR Laboratory ruahman mek chungchang sawihovin NGO hrang hrangte an thukhawm a, NHM Mission Director Dr Eric Zomawia chuan sorkar laipui ‘India COVID-19 Emergency Response & Health System Preparedness Package: Phase-II ’ kaltlangin Lunglei RT-PCR Laboratory mamawh bungrua leh thil hrang hrang leina atan Rs. nuai 30 dawn a nih thu a sawi.
Dr Eric Zomawia chuan RT-PCR Laboratory-a bungrua mamawhte chu Government e Marketplace (GeM) Portal hmanga online bidding kaltlanga lei an nih tur thu leh hmalakna a kal mek tawh thu kalkhawmte a sawi a, “RT-PCR Laboratory-a duty tur staff-te pawh ZMC-ah training thuai tura ruahmanna siam a ni,” a ti.
Covid-19 natna laka naupang venhim chu sorkarin a ngaih pawimawh thu sawiin, Lunglei Civil Hospital-ah naupang damlo nate enkawlna bik, Pediatric ICU ruahman mek a nih thu a sawi bawk.
Lunglei Medical Superintendent Dr SR Ngurchamliana chuan Tourist Lodge building-a RT-PCR laboratory bun turin September 20-ah hna thawk \anin civil works hi October thla tawpa zawh fel a nih thu a sawi a, November 3 khan Planning & Programme Implementation Department official-ten an rawn enfiah thu a sawi.
Lunglei DCHC, tun dinhmuna SIRD Pukpuia awm mek chu Lunglei Civil Hospital building chhunga sawn thuai tura inpuahchahna a kal mek thu leh ICU khum 12 ruahman mek niin thawktute ZMC-ah an training mek thu a sawi.
Zawhna leh chhanna hun hman chhunzawm nghal niin Joint NGO Coordination Committee Chairman Lalrotluanga chuan RT-PCR Laboratory chu Lunglei District leh chhim lam district dang mipuiten an mamawh tawh takzet tih leh MLA-te leh health department hotute chu a rang thei ang bera hmabakte bawhzui nghal tur leh thawktute training pawh ruahman vat turin a ngen.
Joint NGO Coordination Committee member-te zawhna chhangin HPC Vice Chairman Lawmawma Tochhawng chuan Thorang AC bialtu MLA Zodintluanga’n RT-PCR khawl a donate chu makeshift laboratory siam mekah hian hman a nih tur thu a sawi bawk.