EGI-in Tripura-a chanchinbumi thubuai siamsak dem


Editors Guild of India (EGI) chuan Pathianni khan Tripura police-in chanchinbumi tela Unlawful Activities (Prevention) Act hmanga tun hnaia an state-a buaina chhuaka mi 102 thubuai a siamsak chu an dem thu sawiin sorkar zawkin sakhaw zuitute inkara buaina hmehmih tum si lova hetianga hma a lakna hi an dem.
Guild-in thuchhuah an siamah Tripura sorkarin buaina a hmehmih leh a thunun theih loh laia buaina chhuak avanga thubuai a ziah luha chanchinbumite a telh ve chuan ‘a barakhaih tak zet’ tih an sawi tih news agency PTI chuan a tar lang.
Tripura police hian Inrinni khan social media account neitu mi 102 chu UAPA hmang hian thubuai a siamsak a. Heng mite hi an Twitter, Facebook leh YouTube te hmang thei rih lo turin a ti.
Police hian tun hnaia an state-a Muslim-te laka tharum thawhna thleng a chhuinaah Supreme Court-a dan hre mi pali chu social media-a hetiang sakhaw inhuatna lam thil an tar lan avangin thubuai a siamsak tawh a, Indian Penal Code pawh an bawhchhia niin an sawi.
EGI chuan, “Editors Guild of India chu Tripura police-in UAPA hmanga mi 102 thubuai a siamsak zinga thil thleng chanchin an ziah avanga chanchinbumi a telh ve hian a barakhaih hle,” an ti.
Guild chuan chanchinbumi pakhat, Shyam Meera Singh-a chuan Twitter-ah ‘Tripura boruak a lum hle’ tih a tar lan avang chauhvin UAPA hmanga thubuai siamsak a nih thu an tar lang.
“Guild chuan hetianga chetna hi state sorkarin buaina thunun tuma a hlawhchhamna mi danga ben per a tumnaah a ngai a. Sorkar hian thil thleng ziah tur dal turin UAPA hi a hmang thei lo,” an ti.
EGI chuan state sorkar chu chiang lehzuala thil thleng chhui tur leh a thiam lo leh dik lo chu chanchinbumi leh khawtlang hruaitu an nih pawha hrem mai turin a phut bawk.
Tripura-ah hian October 26 khan Chamtilla-ah Vishva Hindu Parishad chuan a hma lawka ram thenawm, Bangladesh-a Hindu mite laka tharum thawhna thleng duh lohna lantirin kawng an zawh a, hetah hian mosque suasamin Muslim ta nia sawi dawr pahnih an hal bawk a. A hnuah Rowa Bazar-ah Muslim ta nia sawi in pahnih leh dawr thenkhat suasam a ni zui bawk niin police chuan an sawi. He thil thleng chhuinaah hian police chuan thubuai an ziak lut a ni.

Leave a Reply

Your email address will not be published. Required fields are marked *

error: Content is protected !!