AMC-a Solid Waste Management Committee hnuaia study group-ten Aizawl khawpui chhunga bawlhhlawh seng hawi dan zir chiangin bawlhhlawh phur lirthei an endik a, bawlhhlawh paih danah thil thenkhat her rem ngai a awm tih an hmu chhuak.
Bawlhhlawh seng hawi dan zirchiangtu, study group hian kar kalta Nilaini atang khan Tuiriala Aizawl Solid Waste Management Centre (SWMC)-a bawlhhlawh paih tur phurtu lirtheite Zemabawk daiah an enfiah a, ni ruk chhung enfiah an tum a; kar thar lamah ni thum bawlhhlawh phurte hi an enfiah chhunzawm dawn.
Study Group chairman, Councillor John Zosangliana Ralte chuan ni thum chhung bawlhhlawh phur lirthei an enfiah tawh chinah bawlhhlawh phurtu lirthei zaa 60 velin an phur theih zat aia tlem daih, an lirtheia leng zat chanve vel bak bawlhhlawh an phur lo tih an hmu tih The Zozam Times a hrilh.
John Zosangliana Ralte chuan lirtheia bawlhhlawh an phurhte chu uluk taka khuh tha tura tih a nih laiin lirthei tam zawk hian an bawlhhlawh phurhte chu an khuh tha lo hle tih a sawi a, ni thum chhunga enfiah hna an thawh hnuah thil fel tawk lo an hmu chhuak a, her rem ngai tam tak a awm tih sawiin, an zirchiannate hi report mumal taka siamin AMC hotuten an en ho dawn tih a sawi.
AMC huam chhungah local council 83 awmin, chunga bawlhhlawh lak khawmte paihna atan lirthei LMV 74 leh MMV 79, a vaiin 153 hman mek a ni a. Ni thum chhunga an zirchianna atanga a lan danin ni tin lirthei 140 velin bawlhhlawh paihna hmun an pan thin a. Kar khatah truck trip 840 vel bawlhhlawh paih thin a, thla khatah truck trip 3,360 vel chu bawlhlawh paih ziah thin ang a ni.
Study group-in bawlhhlawh phur lirthei an enfiah thinna hmun hi Inrinni khan Aizawl Mayor Lalrinenga Sailo chuan a tlawh a, Deputy Mayor R Thanglura leh executive councillor thenkhatten an tawiawm.
Mayor chuan Aizawl khawpui chhunga bawlhlawhte mumal zawka an seng hawina kawnga an dinhmun dik tak hre chiang tura study team an dinten zirchianna an neih hmangin bawlhhlawh paih kawngah ruahmanna fel fai leh tha zawk siam theih an inbeisei tih a sawi.
Tuiriala bawlhlawh sawngbawlna hmun bak hi bawlhlawh paihna tur hmun siam belh tura hmalak mek a nih thu mayor chuan sawiin, Luangmualah plastic bik sawngbawlna tur hmun nei tura ruahmanna kalpui mek a nih thu te, Aizawl chhim lama chengte bawlhlawh paihna din turin Hualngohmunah hma an lak mek thu leh hemi atan hian sorkar lam atangin sum an dawng tawh a, tunah hian bul an tan mek tih a sawi bawk.