HMEICHHE HUANG
Naupai laia ‘depression’ neih!
Naupai hi hmeichhiate nuna thil thleng zinga hlimawm ber a nih rualin, mi tam zawkte tan chuan rilru buaina, rilruhahna, hlauhthawnna, manganna leh rilruhah benvawn (depression) neih theihna hun a ni thung.
Hmeichhia 10-20% te hian a chunga tarlan pakhat tal hi chu naupai lai hian an tawng ngei ngei a, a tam zawk hian depression an tawngbaw thin.
Depression hi naupai laia thlengt htin langsar tak anih rualin, a tir lama enkawl vat a tul hle a, mi tam takin ‘hormone’ rualkhai tawk loh vanga thleng a ni’ tia an enliam mai mai lai hian fimkhurna tur a tam hle tih hriat a tha.
Hei hi nu nu leh naute tan thil hlauhawm tak ni thei a, pawmzam mai mai chi a ni lova, tanpuina leh enkawlna lak thuai thuai tur a ni ang.
Naupai laia depression’ hi engnge ni ang?
Hei hi, ‘Antepartum depression’ tia hriat a ni bawk a, rilru sukthlek (mood) fuh lo, an ti thin. ‘clinical depression’ nen pawh a danglamna a tam lo. A chhan bul berah chuan thluak lama harsatna tawh vang a ni a, naupai laia taksaa ‘hormone’ inthlak danglam nasa tak hian thluak hnathawh pawh nghawng thui viau mai a, chu chuan depression kan tih leh eng emaw phur hluaina ang chi thlengin a lo pe chhuak thin a ni.
Ei leh bar zawnna a fuh lova, chhungkaw dinhmun a tleu a, harsa taka chhun ni leh zan hmang thin te tan phei chuan a hrehawm lehzual thin.
Naupai laia depression lo lan chhuah dan te:
A hnuaia tarlan te hi kar hnih leh a aia tam a lo thlen chuan mithiamte rawn vat tur a ni.
Rilru hrehawm deuh reng
Engmah ngaihtuah tak tak theih lohna
Mut tlem emaw mut tam
Tunhmaa phur taka tih thin, tih peih tawh lohna
Thihna, mahni intihhlum duhna leh beidawnna
Chi-aina
Mahni inthiamlohna leh tling lova inhriatna
Ei leh in hunbi danglamna
Naupai laia depression thlen thei langsar te:
Pasal leh midangate nena inkara harsatna a awmin
Tunhmaa depression lo neih tawh thinna
Naupai harsatna
Tunhmaa nau lo chhiat tawhna
Thawpik leh rilru tawt ut utna
Naupai laia insawiselna neuh neuh awm vangin
Tunhmaa hleilenna leh dirimna lo tawn tawhna
Naupai laia depression hi nautein a chhiatpui em?
Depression hi a tir lama enkawl that a nih loh chuan naute mai bakah a paitu Nu tan a hlauhawm hle. Enkawl vat a nih loh chuan chaw tha leh hrisel ei lohna a thlen a, chu mi kal zelah Zu in, zial zuk leh mahni intihhlum duhna te thlengin a chawh nghal mai thin.
Depression vanga harsatna tawk fo thin te hian an mahni leh mahni pawh enkawl thei tura chakna leh thahrui an neih loh bakah chhula awm naute thanlen zelna tur atan paw’n an theih-na leh chakna te hian a tlin lo fo thin.
A nih leh, engtia enkawl tur nge ni ta ang?
Depression i nei ngei a, harsatna pawh i tawk chho tan ta nia i hriat chuan tanpuina lak vat hi a ni. Doctor thiam tak hnenah kal la, taksaa a lan chhuah dan leh awmdan dik tak hrilh ang che.
Doctor chuan nang leh naute tana tha ber tur a lo kawhhmuh thei dawn che a, enkawl dan tur thlengin a sawipui ang che. Pathian hnaih reng a tha a, tawngtai tam a pawiimawh hle bawk. Mithiamte thurawn lak a sual lova, pasal te mai bakah chhungte tanpuina pawh dil hreh hauh loh tur.
Chutih laiin, depression hi a nasa viau a nih erawh chuan damdawi hmanga inenkawlna lak thuai thuai pawh a ngai dawn tihnia a ni a. A nghawng awm lo thei ang bera kalpui hram a tha.
Hetih lai hian mi thenkhatte chu an harsatna leh buaina hrang hrangte doctor hmaa sawi hreh leh zak deuh tlat an ni a, chuti a nih chuan i nihna leh awmdan ang ang tlang taka i sawipui ngamna tur zawn mai a sual lo.
A pawimawh bera chu, nangmah tanpui inpeih reng leh a hrehawmah pawh i tana ding thei turte an nih a ngai. Nangmah mai chuan depression hmachhawn lo hram ang che. I ril-a rah naute khan tanpuina a mamawh a, enkawl a phu ngawih ngawih bawk.