EDITORIAL 8/11/21


Lunglei RT-PCR a rei tawh mah mah lo maw?

Lunglei a RT-PCR khawl bun turin thawm a nei lian telh telh a, a khawl awmsa reng tawh chunga hman theih tura hmalak thuai a ni lo chu buaina bul ber pawh a niawm e. Covid-19 hri leng vanga kan buai em em lai leh test na tur indaih loh a nat em em lai pawhin sorkar chuan khawl awmsa hman loh dan a ngaihtuah reng niin a lang a, mipui lam atanga nawrna a nat tawh em avangin tunah hian hman theih turin an inbuatsaih tan ve mek tawh niin a lang.
Zirtawpni liam ta khan Lunglei HPC Vice Chairman Lawmawma Tochhawng hovin Lungleia RT-PCR Laboratory ruahman mek chungchang sawihovin NGO hrang hrangte an thukhawm a, hemi hunah hian Dr Eric Zomawia chuan RT-PCR Laboratory-a bungrua mamawhte chu Government e Marketplace (GeM) Portal hmanga online bidding kaltlanga lei an nih tur thu leh hmalakna a kal mek tawh thu kalkhawmte hmaah a sawi a, “RT-PCR Laboratory-a duty tur staff-te pawh ZMC-ah training thuai tura ruahmanna siam a ni,” a ti bawk.
Inbuatsaihna hun hi duh tak tak nise a tam viau a, court thu hnial ngam loh vanga hmala ta chuk chuk an ni pawh a lang reng tawhin a hriat. RT-PCR khawl bik hi MLA pakhat pek tawhsa hman a nih tur thu sawi a ni a, a enkawltu leh thawktu lam la training dawn laih laih chuah erawh hi chu a tlai tawh deuh mah mahin a lang. Hri leng hi a la reh miau lo a, engtik hunah pawh training in, hna zawm se, a hlutna a ngai reng dawn. Sorkar berin an ngaihthah rei lutuk erawh hi chu a manganthlak lam deuh tawhin a lang thung a ni.
Hmalakna a awm tan nia lang pawh hi na zawkin tang tlang se la, a hlawhtlin thuai theih dan theihtawp chhuahin tun atangin hmalakna kalpui thuai thuai zel teh se.

Leave a Reply

Your email address will not be published. Required fields are marked *

error: Content is protected !!