Tuirial bialtu MLA atana thlan thar, K Laldawngliana chu nimin khan Assembly House Speaker Lalrinliana Sailoin rinawmna thu tiamtirin a la lut.
Hemi puala inkhawm Assembly Annexe Conference Hall-a neih hi Assembly Secretary H Lalrinawma’n a kaihruai a, hetah hian Chief Minister Zoramthanga, Agriculture Minister C Lalrinsanga, Supply Minister K Lalrinliana, School Education Minister Lalchhandama Ralte, Social Welfare Minister Dr K Beichhua leh MLA engemaw zat an tel a ni.
Tar lan tawh thin angin, Turial bialtu MLA Andrew H Thangliana chu kumin August 17 khan a boral a, he bial ruak hnawh khat tur hian Election Commission of India ruahman angin October 30 khan inthlanna hi neih a ni a, hetah hian MNF candidate K Laldawngliana chu hneh taka thlan tlin a ni.
Tuirial bial MLA atana lak luh tak, K Laldawngliana (49) s/o K Ngurkhuma (L) hi Dinthar, Aizawla khawsa a ni a, zirna lamah MA (Economics) zoin, kohhran leh khawtlang rawngbawlnaa inhmang tak, hruaitu chanvo pawimawh hrang hrang lo chelh tawh a ni a, kum 2018-23 atana MIZOFED Chairman a ni.