Premier League hmahruaitu Chelsea chu Burnley in an chelh a. Blues coach Thomas Tuchel-a’n vanduai vang liau liau in kan chak zo lo tia a sawi inkhelah 1-1 in an inhnehtawk.
Stamford Bridge-ah Chelsea hian first half-ah Burnley goal hi vawi engemaw zat tih thaihin minute 33-naah goal an khung a. Reece James-a ball cross chu Kai Havertz-a’n tun season a league a goal a khung vawi hnihna ni turin a tauh lut.
Blues in goal an khung belh teuh thei hle a. Thiago Silva chuan goal ban teuh perin Nick Pope-a’n Callum Hudson-Odoi goal khung tur a save sak bawk.
Mahse second half-ah Blues in goal an khung belh loh rah an seng a, Burnley in goal khungin Ashley Westwood ball vawrh luh chu Jar Rodriguez-a’n a tauh pial a, substitute Matej Vydra chuan goal-ah a khung.
He inkhel result avangin Chelsea in a zawna Premier League match li hnehna an chan tawh chu tihtawp a ni a. Inelna hrang hrangah a zawna match sarih an chaklai pawh a tawp nghal.
Thomas Tuchel-a pawlte hian tunhnaiah an striker rinrawl inhliam Romelu Lukaku awm loh lang lo turin kheltha thin mahse Burnley lakah an mamawhna a lang a, a tharum leh goal hmaah a hmawr a bawk thiamna an mamawh.
Inkhel zawhah Tuchel chuan, “Hei hi football kan ngainat chhan chu a ni, team tu pawhin point an hmu thei a. Goal khung theih loh miau chuan tu tan pawh kawng a inhawng reng.”
“Kan kheltha a, chuvangin kan result hi pawm har ka ti hle. Hetiang hian vawi 100 inkhel ila, vawi 99 chu kan chak ang. Vawiin erawh vanneihna kan lamah a tang lova, goal khung belh chiah ila inkhel kha a kaldan a dang vek ang. Mahse hetiang hi a thleng ve thei.” a ti.