Mizoram sorkarin Myanmar raltlan naupangte zirna an awmna hmunah sikul kai ve se a tih angin raltlan naupang 1,972-ten sikul an kai mek.
Education department-in raltlan naupangten sikul an kai ve theih nan hma a la a, tun dinhmunah raltlan naupang sikul lut mipa 1,010 leh hmeichhia 962, an vaiin 1,972 an awm mek a ni.
Raltlan luh tamna Champhai district chhungah raltlan naupang sikul kai 711 awmin,a dawttu Lawngtlai district-ah zirlai 539, Hnathialah zirlai 341, Siahaah zirlai 260, Aizawlah 70, an awm.
Zirlai tlem berna, Kolasib-ah raltlan naupang sikul kai pali chauh an awm a, district dang – Lungleiah pakua, Mamit-ah paruk, Saitualah pasarih leh Khawzawl-ah zirlai panga sikul kai an awm a ni.
Sorkar rem tihna angin Mizoram chhung khaw hrang hrangah zirna in hawn zel a ni a, district 11-ah zirna in 1,359 hawn phal a ni tawh a, hetih lai hian hawn phal tawh zinga 430-te chu hri leng avangin khar leh a ni tawh a, hriat theih chinah zirna in 933 hawn mek a ni.
Hetih lai hian Aizawl Municipal Corporation huam chhungah erawh zirna in hawn phal a la ni lo a, board exam tur pawl 10 leh 12-te erawh regular-a sikul an kai phal a ni tawh thung.
The Zozam Times zawhna chhangin education department hotute chuan, pawl 10 leh 12 te chu November atangin sikul an kai tan phal ni tawh mah se AMC huam chhungah erawh a taka la kalpui a ni lo a, kar thar lamah chuan zirlaiten sikul an kai tan tawh hlawm dawn tih an sawi.
“Thawhtanni atangin sikul an kai tan tawh hlawm dawn a, department-a thawktuten zirna in hrang hrangte fang kualin hri laka himna SOP an duante an zawm that leh that lohte an endik dawn,” an ti.
AMC huam chhunga zirna in zawng zawng hawn theih hun tur erawh a la sawi theih loh tih education department hotute chuan sawiin, “AMC huam chhungah hri leng hi ziaawm chho mah se zirlai naupang, a te zualte sikul kai phalsak chungchang hi sawiho a la ni lo a, hri dannate an la lak ve loh avang hian an tan hian a him lo nia ngaih a ni,” an ti bawk.