Bawlhhlawh paih kawnga siamrem ngai siamrem zel a tul
Tun hnai khan AMC-a Solid Waste Management Committee hnuaia study group-ten Aizawl khawpui chhunga bawlhhlawh seng hawi dan zir chiangin bawlhhlawh phur lirthei an endik a, bawlhhlawh paih danah thil thenkhat her rem ngai a awm tih an hmu chhuak tih kan hre theuh awm e. An thil hmuhchhuah hrang hrangte hi la tarlang kil kelh lo mah se, ennawn ngai tak hi chu a ni tawh a ni.
Bawlhhlawh phurtute hi man chawia rawih vek an ni a, khawpui a thianghlim theih nan bawlhhlawh thliar hran thlengin mipuiin kan thawk a, zirtirna pek reng kan ni bawk. Heti chunga fel lo la awm leh thin hi chu enfiah thuai thuai zel hi a hun hle bawk a ni.
Enfiahtute sawi danin bawlhhlawh phur thenkhat hi chuan an phurh theih zat aia tlem daihte an phur niin a lang a, thenkhat erawh chu an thil phurh pawh ngaihtuah tawh lem lo, a khat lutuk avanga kawnglaka thlauh thente awm theih tak a ni. Bawlhhlawh a nih avanga eng he hua ngai zui lem lo, faina kawnga hmai balh theihna a ni tih ngaihtuah zui tawh lem lote an awm nawk niawm a ni.
Tin, a paih danah pawh hian fimkhur telh telh ila, siamrem ngai hrang hrangte hi chu a rang lama siam fel zung zungin, hmalatute pawhin ngaihtuah ranah nei zel mawlh teh se. Chutiang tur chuan mipui lam pawh zirtirna pek thar reng kan ngai bawkin a rinawm.
AMC lam hian theihtawpin khawpui thianghlim a awm theih nan hma an la a, bawlhhlawh paihna hmun tur pawh siam belh zel an tum niawm a lang a, hemi lam kawnga an hmalakna hi a fakawm tak zet a, mipui lam pawhin zirtirnate hrereng chunga kan theihna zawna kan lo tawiawm thiam ve zel pawh a tul awm e.