Eirua Chief Minister Zoramthanga puhna thubuai chungchanga thutlukna chu nimin khan Court of Special Judge (Prevention of Corruption Act) Vanlalenmawia’n puangin thiam a chantir.
Zoramthanga hi thubuai pahnih, sorkar sum hmang dik loa, thuneihna hmang suala dik lo taka Aii puk rama a huan hung nana sorkar pawisa senga Goat proff wire-mesh (Kelpal) leh Angle Iron Post inpektirah leh mahni sum lakluh aia hausaah puh a ni.
Heng thubuai hi vawi tam tak ngaihtuah tawh a ni a, Aii puk chungchang bikah chuan witness-te thusawi a\angin court chuan Goat proff wire-mesh (Kelpal) leh Angle Iron Post chu Aii puk zau tan hian pek a ni ngei tih sawiin, helai zaua huan neitu tam takin an chhawr tih leh ram neitute huan thing leh mau te, thlai te rukru lakah a him theih nana pek an ni tih a sawi.
Agriculture department hian lo neitu/huan neitute tan heng bungruate hi an pe thei tih a chian bawk avangin he thubuaiah hian thil dik lo awmin a lang lo tih court chuan sawiin, thiam loh chantirna tur thu tling hmuh a ni lo a, thiam chantir a ni tih judgement order-ah chuan a tar lang.
Court judgement order-a tar lan a nih danin, mahni sum lakluh aia hausaa Zoramthanga puh a nih chungchangah hian a tehna tur (check period) chu kum 2003 a\anga kum 2008 inkar a ni a, hetah hian a asset zawng zawng kum 2003 hma lam leh kum 2008 tawpa a asset neihte hlutna zawng zawng leh hemi hun chhunga an chhungkaw sum hman dante chhinchhiah tur a ni.
PWD-in Zoramthanga immoveable asset pasarih an enfiah tih judgement order-ah hian tar lan a ni a, heng zinga panga hi check period hma lam, kum 2002-a siam zawhte an ni a, Ramhluna an chenna in leh Chaltlanga Residential Hostel an neihte chu a hlut zawng an chhut a; mahse, check period hma lam hian eng chen nge an lo khawih tih an sawi chiang thei lo tih a tar lang.
Court chuan an chhungkaw account leh LIC-a sum an neihte hi a \hen check period hnu lam a ni hlawm a, hetiang hi thil awm dan a nih avangin mahni sum lakluh aia hausaa an puhnaah pawh hian thiam loh chantirna chhan tur thu tling a awmin a lang lo tih judgement order-ah hian tar lan a ni.
Court thutlukna puan hnua chanchinbu mite zawhna chhangin Zoramthanga chuan court thutlukna chu a pawm thlap thu a sawi a, thiam chantir chu a phu reng tih a sawi.
Zorama chuan, “Hun rei tak thubuaiin min kalpui hnuah judge zahawm takin min chhuah ta leh thiam min chantir ta hi lawmawm ka ti a, a dik ka ti a, ka lawm khawp mai,” a ti bawk.