United States chuan thla 20 zet a ramri a khar hnuah ram dang a\anga tlawh tumte tan a inhawng leh ta a; mahse, Covid-19 laka invenna damdawi a bikima la tawhte chauh an zin thei.
Ram dang mite tana an ram tlawh phal lo hi president kal chhuak ta, Donald Trump khan Covid-19 avangin a tichhuak a ni.
Khapna hian ram hrang hrang 30 chuanga US mi ni lote a nghawng a. Zin phal loh zinga UK leh EU ram mite pawh an tel a, chhungkaw tam tak in\hena awmin khualzinna lam thil pawh a nghawng na hle.
Airline-te pawh zin a theih leh tak avang hian an \ul leh tawh hle tura ngaih a ni a. Invenna bikima la tawhte hi endik leh an hnuhma en zui erawh an la tum a ni.
Paris-a hmunpui nei, travel agency Jetset Voyages-a an hotu, Jerome Thomann chuan, “A \ha, a \ha tak zet a ni!” tiin Reuters news agency a hrilh a, a team-te pawh zin tuma inziak lutte buaipuia an \ul nghal hle thu a sawi.
Coronavirus darh zel tur ven nan US hian kum 2020 kum tir khan China ram a\anga lut tur bik tan a khar phawt a. Hri a darh zau zel hnuah ram dang lut thei lo a tipung ta zel a ni.
US-a zin theih loh hi US khua leh tui ni lo, UK leh Europe rama miten an tuar ber a. Anni bakah China, India, South Africa, Iran leh Brazil a\anga tlawhtu leh awm an tamna avangin an buai phah hle bawk.
Inkaihhruaina tihchhuah tharah chuan ram dang a\anga zin turte chu thlawhnaa an chuan hmain invenna bikim an la tih chianna an nei ngei tur a ni a, an zin hma ni thum chinah tal Covid-19 an kai lo tih finfiah an ni tur a ni a, biakpawh zung zung theihna tur an dah tel tur a ni a bawk a. US an thlen hunah khung hran erawh an ngai tawh dawn lo thung.
British nu, kum 63 mi, Alison Henry chuan, “A hrehawm tak zet a, ka fapa hmuh ka duh a ni,” tiin AFP news agency a hrilh.
Cheshire-a cheng, Henry-i hian thla 20 hnua a vawi khat nana a fapa hmu turin New York panin Thawh\anni khan a thlawk chhuak.
Thla 20 zet hnua US-in a ramri a hawng leh tur hian a tha lam leh chhe lam pawhin nghawng a nei dawn a. Mexico nena an inrina lai bik atang chuan an rama pem tum tam tak an luh nghal rin a ni.
Mexico chhim lamah chuan mi sang tel, naupang tam tak nen US-a luh tum hi an awm khawm mek a. Heng mite hi Central America ram atanga luh tum an nei ber a, Chiapas atangin, Oaxaca state kal kâna ramri thlena US luh tum an ni hlawm.
Hetih lai hian Covid-19 avanga inkhuahkhirhnain an sumdawnna nasa taka a nghawng, Mexico nena an inrina bul hnaia khuate chuan an sumdawnna a than leh phah an ring a. Mexico lama rami khuate pawhin chu tho chu an beisei bawk.
United Airlines chuan ram dang atanga US luh tum hi 50% zetin an pun an ring a, Delta Airlines chief executive Ed Bastian pawhin zin tumte chu thui tak an intlar hial a ngaih a ring bawk.
Bastian chuan, “A hmasa ber chan a chang deuh va, hei vang hian intlar a ngaih ka ring a ni,” a ti.
US hian thlawhna hmanga an rama luh a phalsak ruak hian lei lam atanga Canada leh Mexico nena inkalpawhna chu invenna bikim la tawhte tan a hawng ve nghal tho bawk a ni.
US a inhawn chauh lai hian EU ramte chuan American-te hi an ramah June atang daih tawha an zin kha a lo phal tawh a, UK pawhin July 28 atang khan US atanga zin luh a lo phal tawh bawk.