World Health Organization hotu lian pakhat chuan Turkmenistan ramin Covid-19 kai an la nei ve miah lo chu thil ni theia a ngaih loh thu a sawi.
“Kum hnih dawn khawvel pumah hripui a leng tawh a, science thiamna atanga thlir chuan Turkmenistan rama a kai an la awm ve miah loh hi thil theih a ni lo,” tiin Dr Catherine Smallwood, WHO-a senior emergencies officer chuan a sawi.
Turkmenistan hi North Korea ang bawkin an rama coronavirus kai la awm lova inchhal a ni a. Dr Smallwood-i’n a sawi chhuah hi vantlang hriata a inchhalna WHO-in a sawi zuina hmasa ber a ni.
WHO hian ram tin sorkarin an ram theuhva an dinhmun an chhinchhiah chu inchhiarna atan a hmang a. Tun thleng hian Turkmenistan chuan Covid-19 kai an la neih ve loh thu an sawi a, chanchinbu leh mi tam tak sawi a hlawh hle.
Turkmenistan hian thu dik lo an hrilh a ni mai lo maw tia zawhna chu Dr Smallwood-i chuan chhangin zah fiah an tum lem loh thu leh International Health Regulations-in kalphung a zam anga ramten khawtlang hriselna lama inkaihhruaina a neih ang an bawhchhiat loh chuan tih zui an tum loh thu a sawi.
Dr Smallwood-i chuan thu inzawh fiah ai chuan thuneitu, President Gurbanguly Berdymukhamedov leh mi dangte pawh biaka thil chiang inhrilh a that thu a sawi.
Mi thiamte chuan Turkmenistan sorkarin an rama coronavirus dinhmun a chhinchhiah chu a rintlak tawk loh niin an ngai a. A chhan lian berah chuan thu an thup nasa a, mi pakhat thuneihna a sang bawk niin Human Rights Watch-a Europe & Central Asia division deputy director Rachel Denber chuan a sawi.
Turkmenistan sorkar hian tun hma pawhin thu thup leh mi hriat duh zawh chhuah nana inhrem pawh an ching thin hle.