US rapper Travis Scott chuan tunhnaia Texas festival Astroworld-a a zainaa chhiatna thlenga mi pariat thihnaah thubuai thahnem tak a hmachhawn dawn niin a lang ta.
He concert chhimtute zinga hliam pakhat chuan Scott leh Drake te khan mipui boruak an chawk khawlo vek, tiin zangnadawmna $million khat a phut ve bawk.
Thubuai siamna chungchangah zaithiam pahnihte’n thu leh hla an la neih loh rualin, Scott chuan thi chhungte tanpuina kawngah theihtawp a chhuah ang, tih a sawi. Thi zinga naupang ber hi kum 14 mi a ni.
Nimin thleng khan social media lamah thi chhungte tawrhpuina leh tawngtaipuina a richuah chuah reng a, zirtawpzan kaltaa thil thleng hian thawm a nei lian zui hle. Stage hmalamah mipui inhnawhkhawm nasa tak khan pawi nasa tak a thlen ta a ni.
A hmuna chhim ve Lucas Naccarti chuan rapper in stage a mawi hnu minute 3 velah chhiatna namen lo a thleng ngei dawn tih a lang nghal reng tih sawiin, “Mi thahnem tak an thi ngei dawn tih kha a chiang nghal viau a ni. Mahni hmai ngei pawh kan khawih pha tawh lova, chet hleih theih lohin a tawt hle a ni,” tiin BBC Radio 5 a hrilh.