MNF party adviser Lalchhandama Ralte-in “Kan hotupa ber hian Pathian bel chungin ram a hruai a, a ding leh veiah NGO leh kohhran hruaitute a hmang thiam a, a thutpui ministry leh official-te a hmang thiam hle” a ti.
MNF party chhung inkhawm nimina neihah he thu hi Lalchhandama Ralte chuan a sawi a. “Kan CM/Minister/MLA-te hi min thlir ula, kan hotute zawng zawng hi Pathian tihna nen ram rawngbawl hnathawk vek an ni” a ti.
“Opposition ten social media-ah kan hotute hi bei bei thin mahse, an nghing ngai lo” Lalchhandama chuan a ti a. “Ramri buai kan neih lai khan kan hotute a fan theih angin an fan a, a ngul a per hunah chuan kan CM leh hotute huaisen zia a lo lang a nih kha” tiin an hotute finna leh ropuinain ram a tizahawm niin a sawi.
Lalchhandama Ralte chuan Covid chungchang sawiin, “Mipui an phun nasa a, media-ah sorkarin beihna nasa tak a tawk a. A khaikhawmnaah chuan Covid vanga thi tlem ber state kan la ni reng a, symptom nei chauh state dangah an test laiin keini chu contact tracing nen kan inumzui nasa a, kan inhmuh tam phah zawk mai chauh a ni” a ti a. CM-in thawhhona tha dawhthleng a siam thiam nia sawiin, “Mimal, NGO, kohhran, sorkar hnathawk ten CM relief fund-ah sum an chhunglut ruih ruih a, a hman dan lah NGO, kohhran leh official ten langtlang takin an rel a. Hripui dona kawngah hian a titha ber state kan ni,” a ti.
School education minister ni bawk Lalchhandama Ralte chuan Mizorama sorkar hnathawk za-a 30 vel chu education department-a thawk an nih thu sawiin, education department-ah hmel thar hmuh tura tam thu leh sorkar sikul siam belh rawtna pawh a tam thu a sawi a. “Enrollment ti pawh an pung nasa hle a. Kan duh ang tawk sum hmu lo mah ila, a awm sa kan hmang thiam a ni,” a ti bawk.
Labour employment lamah pawh “Kan thalai talent nei thate nasa takin kan promote mek” Lalchhandama chuan a ti a. “Civil service tam zawk kan inchherchhuah theih nan nasa takin kan inbuatsaih mek a ni,” a ti bawk a ni.