Mizoram mipa senior cricket team chuan Thawhlehni khan Manipur lakah wicket 8 in hnehna an chang a. Syed Mushtaq Ali Trophy 2021-ah hnehna nen Plate Group an khel zo.
Vijayawada khawchhunga Mulapadu khua a T20 match ah hian Manipur in vuak hmasak an thlang a. Mizoram tan Bobby Zothansanga che tha in over 4 a vawm chhungin run 11 chauh a pe a, wicket pawimawh pahnih a la.
Remruatdika leh G. Lalbiakvela ten wicket hnih leh wicket khat la ve bawkin Manipur hian over 20 chhungin run 100 bak an siam thei lo.
Mizoram in vua in opener Lalhmangaiha’n run 16 siam a bul a tan hnuah outstation player pathumten a tawp an khar a. Mizoram tana la khel char char Taruwar Kohli chuan run 38 siamin Uday Kaul leh Iqbal Abdullah ten run 31 leh 16 an siam a, over 15-ah run 105 an tlin der a, wicket hnih chauh an hloh.
Syed Mushtaq Ali Trophy hi India rama BCCI hnuaia state hrang hrangte inelna niin Mizoram hi Plate Group-ah India hmarchhak state dang Meghalaya, Tripura, Nagaland, Sikkim, Manipur leh Arunachal Pradesh te leh Vidarbha te nen an awm a. Team tinin match 5 theuh khelin Vidarbha in hnehna an chan vek avangin Plate Group atangin Preliminary quarter-final an khel ang.
Mizoram hi cricket a team tha nei tawh Meghalaya leh Sikkim-te lakah an tlawm a, Nagaland leh Tripura lakah vanduai zawkah tang bawkin khelh nga atang point li an hmu a. Plate Group-ah hian parukna an hauh.