2018-a Congress chak loh chhan leh kan hrawn mek MNF ministry

2018-a Congress chak loh chhan leh kan hrawn mek MNF ministry

• Laldawngliana, Kolasib

Kan rin ngam tawh loh te i hnawl ang u,” an ti kha a ni a, MNF hian hming chhiatna tam tak nei chungin; an vanneihna a rawn inherchhuak ve bawk a ni tih an inhriat that leh thain ka hria, siamthat tur hi chu an nei a ni. Congress-ah pawh siamthat tur hi chu a awm, sawrkar leh tur pawn mipuiin sawrkar leh tlaka an hmuh phawt a ngai . Congress hian kalphung dik lo siamtha tura kohna a hmachhawn mek a ni. Sawrkar anga kal dik lohna leh party anga kal dik lohna kha a lian hle. Mite tih dan takah huam hauh ve te te, zar zo tum te inhawrkhawm ang lek a mipuiin an hmu a nih chuan kum 2023 election-ah beisei tur a awm lovang, MLA neih belh lam ai mahin a chan belh ang.
BJP-in inthlan khan Golden Mizoram min tiama, Mizorama cham mek National Secretary Pu Ram Madhava’n Mizoram chu sawrkarlaipuiah Cabinet Minister min tiam, Engineering college – 3 leh Medical college – 2, kum 5 chhunga hna 50,000 siam, thla ruk chhunga kawng tha siam, Mizoram Development Council din, District hmunpui tina football stadium siam, BPL tan buhfai kg-ah Cheng 1-a pek, thla-3 chhunga Aizawl traffic jam tihreh, kum-3 chhunga in nei lote in pek . Congress in HSLC leh a chunglam pass te tan a thlawna laptop sem, College leh University zirlai tan study tour kum tin Budget a dah, Ambulance network siam, Tourism leh Health care scheme changtlung tak buatsaih te a ni tlangpui; Mizoram State Boundary enkawl bik tur Boundary Commission din leh Science leh Mathematics tellova Matric pass dan. BJP President tuna India rama kan Home Minister ropui tak Amit shah hian, sawrkar laipuiin Mizoram sawrkar tanpuina a pekte chu corruption avangin hman tangkai a ni lo thin niin a sawi a. Mizoram Chief Minister-in min pek awm chhun chu corruption leh Lal chhungkaw sawrkar a ni, nasa takin a nau Chief Minister-tir tumin hma a la mek, NLUP atana an sum hmuh pawh an eiru niin a sawi. “Tourism lamah Mizoram in hmasawnna tur in ngah, sawrkarin eiruk ringawt an ngaihtuah avangin tourism lama hmasawnna pawh sawrkar rilru ah a awm lo a ni” a ti. BJP-in sawrkarna an siam chuan ram pum atanga khualzin hip theihna atan Mizoram hi siam a ni ang. Kha tih hun laia Union Home Minister Rajnath Singh pawn “Mizoram hian Development in mamawh chu mamawh chhanna chu BJP candidate te lo thlang tling ula pek in ni dawn a ni,” a rawn ti a. An hotu dang lo kal te pawn Mizoramah an sawrkar a nih chuan four lane-a national highway an siam dawn thute pawh an rawn sawi a ni. Govt.of India a kan Home Minister Pu Amit Shah khu inropui takah a khawsa lo an ti tlat a ni, Central-a BJP hotu te rilruah eiruk lam hi a awm ve lo a ni ang. America President Calvin Cooligde chu President warren G.Harding President anih laia sawrkara hlemhletna leh dik lo taka sum hman awm nia a hriat chu tim hauh lovin a enfiahtir tihte khawvelin an hria .
Khatih laia Chief Minister nihna la nei lo; kan Chief minister hian “tlin tumin congress party-in hma an la tawh lo, a tam thei ang ber mimal inhaivur tumin tan an la theuh ringawt mai a ni, mipui duh loh zawngin an kal lui ngat ngat a ni,” a ti. Sum awm loh vangin hmasawnna a tawp a, congress party mite ngei pawh an beidawng tawh ni khan a sawi a. LEIT Dept- a sum hman dik lohna nasa lutukte hi heti mai hian a tawp dawnlo, Lottery-a cheng vbc tel eirukna te, di hmunzawl inthiah dan mak te, Mizo carbon truck Meghalaya atanga Aizawl nikhata vawi-3 lungalhthei phur theite hi mipui hian a awmzia dik tak an hria tih a sawi. Prism pawhin congress sawrkar kha na taka demin an eiruk nasat avangin eiru pawh an hrem ngam lo. An eiru lo an ti a nih chuan Minister te, Speaker te leh MLA zawng zawng thil neih puangin a thlalak te mipui hmuhtir se kan duh .Tuna ram hruaitu zingah hian nasa taka eiru, an dinhmun an chelh hnua an hlawh leh dik taka an sum lakluh in a lei phak loh inhmun leh ram te, in te, lirthei leh bungrua man to tak tak nasa tak taka neih belh an tam hle. An eiruk nasat avang hian Chief minister meuhin eiru leh thil dik lo tia hriat te leh sawrkarin eiru a chhuichhuah thlap tawh pawh an hrem ngam loh phah a ni. Eiruk leh eiruk loh kawnga hetianga thu dik lo an sawi zel dawn chuan inthar ropui tak tak leh thlalak leh a neitu eiruk fihlim te leh thildang puanchhuah fo a ngaiah Prism chuan kan ngai a ni tiin sawrkar an dem hle a ni .
Congress sawrkarin chhun en laiin Mizoram mipui an rawk MNF party in an ti a , UD & PA atangin work order 826, vbc .19. 44 man, LAD atangin work order 216, vbc. 3.6 man, MSSC atangin work order 81, vbc. 26. 40 man, leh RD atangin BADP hnuaiah work order 81 cheng vbc. 8. 3 an pe chhuak a , heng work order te hi 1,204 lai niin cheng nuai 5,773.82 man hu zet inthlan hnai tawh takah tih chhuah a ni, SIPMIU hnuaia ek in man to taka sak leh bawlhhlawh paih motor to taka lei te, NLUP beneficiary nilova vbc 100 chuang hman leh NLUP pawisa puktir vak mai te, CADC & HPC sum bothlau te, Tender/ quotation chhuah lova contract leh supply tam tham tak inpek te, Tantia leh Sunshine Overseas in hnalian an thawk tam lutuk te, buhfai chung chang te, NIAS a thilthlengte leh Office of Profit kha … Opposition-in sawrkar an beihna langsar te a ni a, mipuiten sawrkar pawh an dem phah hle a ni. Sawrkar hian hma an lalet thei a nih loh chuan opposition laia sawrkar an beihna zawng zawng kha dawt a ni ang. Sawrkar sawisel leh dem an duh hun pawh a ni a lo la thleng leh thei; chutiang hunah chuan, tuman an awihsak duh tawh lo ang. Mizoram Pradesh Youth Congress commitee chuan hri a len laia MNF sawrkarin an party worker te tana contract an sem duh loh lantirna atan work order an hala, anmahni leh an duhsak zawngte an inhaivur thung, work order kan hal chhan pawh hi mipui thlavang hauhna atan a ni an ti a. Congress leh MNF hi Mizoram mipuiten thuhmun renga an hmuh chuan election leh hian an tla ang. MNF hi han sawrkar leh ringawt pawh nise, eng hi an ang dawn chuang in mite rinlohna hi a lian hle tawh a ni tih hi an inhriat ka duhsak hle .
Sawrkar liamta kha han thlirlet ila a chhelai kha a chhe ema tin ni. ‘Mite u hre rawh u in chau dawn e, ram hla taka awm te u, beng chhi rawh u. Ani in peih ula, hlau viau rawh u, ral rel ula a hlawhtilng chuan lovang, induh tawkin sawi ula, a sawt bawk hek lo ang…’ Keini pawh in enlet kan ngai a ni kan lo thiam lo ve a ni ti mai tur kan ni. Vote chhiar ni kha manganna leh zilhhauhna leh hmingchhiatna lo lanna ni a ni. Nimahsela; sawrkarah khan engkim a buaiin a chhe vek a ni chuang lo. Hmasialna boruak mahni intundin tum tlatna khan hmun a changzau em a ni . Hotu nih tlin hi thil harsa tur niin ka hria, Pu Lalthanhawla nunphung hi a zahawma a vanglai nite kohkir theih nise kan va ti em. Hotu nih piah lamah party mite tan nu leh pa nih a tlin em em a .Tun hma tak taka congress ban pawimawh lo ni tawh te kamchhuak ka dawnah chuan, ‘inthlan dawna congress party boruak an sawinaah chuan Pu Hawla rilruah inthendarh lam hi a lang ngai lo asin’ tiin congress hun tawng kha mak an tih thu min hrilh nghe nghe a ni . Congress Sawrkar kha a lo tawp ta a . Kan lo chapo hman tawh zia te nen enin, Lalpa intum dal rual a awm lo ti mai tur kan ni . Congress term liam ta kha sawisel a ngaihnaah chuan Zoram mipuite hian sawizui zel an la duh.
William Booth a’n ‘Heng zu zawrhna ka pelh lai hian ka benga aw ka hriat chu – Heng mite lo liama Pathian ring lotu an awm chuang dawn em ni?’ a ti. Inthlan puan an nih khan Zoram Thar aimahin zu zawrhin Kohhran hote beng a luah zawk mah a ni . Sawrkar kha a thulang chiang a ni.. Bial 40 awmna, Candidate 209 awm, Voters nuai 7.7 awmna, Mizoram kan han inthlang kha mipui tan tak a ngahhlelhawm, MNF-in seat 26 a la a; sawrkarna ansiam hi kan lawmpui. Pu Zoramthanga ‘n kum 2008 leh 2013 ah EVM avangin amah leh MNF party chu an chak lo tih a lo sawi tawh a, tun tumah Dy.CM zahawm tak nen thlan tlin anni leh ta hi a mimal tak pawn kan lawmpui ve a ni. Sawrkar an inremfela chini sem a nih tur thu kan han hre zui nghala Kolasib mipuite kan hlim hle; chak aia tlak reltu te khan party chawk tho tura zinchhuah an lo rel ve mek bawk a.
‘Rorelna dik leh hleih nei lo mipuite’n kan mamawh a, huaisen leh dik taka rorel a pawimawh . Mipui huapzo thei ang bera hnathawh kan tum’ tih I&PR Minister-in a pisa a luah nia a thusawi te hian mipui a ti hahdam hlein ka hria. ZPM lamin, ‘hleih neia rorel hi mipuiin kan kham tawh a, induhsakna rualkhai lo hi mi tinin kan ning tawh, ZPM Party chuan roreltu ni ringawt lo mipui rawngbawltu ni tel tur sawrkar din kan tum a ni,’ an ti a ni. Assembly-pariatna kal meka MLA-te an bial tana an thahnemngaihna hi ropui ka ti hle a ni. ‘Kei hi Lalpa, in Pathian inthatna tur a nangmahni zirtirtu inkalna tur kawnga hruaitu che u ka ni, in thinlung zawng zawngin Lalpa ringla nangma hriatnaah innghat suh, i kawng zawng zawngah amah hre rengla, i kawng te chu aman a kawh hmuh zel ang che.’ Mipui te hian sum ngainatna leh duhamna zia thailanna sawrkar kan duh tawh dawn lo. Sawi thu a cheng lo sawrkar kalta kha sum tuak nan an hmang an tih thawm te pawh kan hnen a rawn thleng ve zel a ni, lo la hrawn zel ila chuan a hahthlak dan tur leh Party mite chep dan tur te hi sawi ngam pawh a ni lo hial a ni. Reitheihna bawiah kan insiam ang a, mi tlemte thuneihna sawrkarah kan lut dawn a lo ni reng a, Mizo mipui te hi sum leh pai duhamna hian min ei ral thei thawthang hial awm asin. Leia lalte leh roreltute u, fimkhur takin zilhna pawisa ula , tichunga Lalpa rawngbawlin khur chungin che rawh u.
Congress hi mipui nghenchhan tlaka a inbuatsaih thei a nih loh chuan sawrkar leh mai ring hi an la tam lo hle; chuvangin, Congress sawrkar leh nana rilru sen chu la hma deuha la ngai an la ni deuh vek zawk a ni. Mahni hmasial boruak hi mipuiin ankham thawkhat tawh, Mipui tana tangkai zawka party-in hna a thawh theih hi a pawimawh a chu a ni. An khaw hawi tizau a congress mipui te hi an kal phawt chuan sawrkarna ni pawh a lo la thleng ve leh mai ang. Chul ram pawh vah that leh theih a ni alawm. Amaherawhchu, khatianga sawrkar demna thawm a len viau hnu khan kei ngei pawhin congress nih zahthlak khawpa mite titina hmun ka tawng ve fo mai. Khatiang sawrkar kha congress mipuiten neih leh hi an chak ka ring lo. Tun din hmunah hian ram mamawh kan sawi tam em; nge sawrkar sawiselna kan sawi tam zawk.
Chief Minister-in mi pawimawh hrang hrang te hmuin Mizoram mamawh dangte a sawipui thu kan hre chho ve renga. Sawrkar laipuia a hna hmasa te zingah CAB chungchanga Mizo mipui ngaih dan te, Mizoram tana All India Service Cadre hran neih te, The Mizoram ( Maintenance of House-hold Register) Bill 2019 te, Tripura-a Bru refuge chungchang te, Assam Rifles sawnchhuah te, DoNER leh NEC a sum tam zawk dah te, Hindi zirtirtu chungchang te, Zoram Medical College chu AIIMS zulzuia medical college – cum -hospital a din leh, home dept. mamawh hrang hrang sawipui te chu a hna hmasaa a zu neih te an ni a. Tin, Lengpui Airport tihchangtlun dan tur te pawh a hna hmasa zinga mi a ni. Tun hnaiah Governor tha tak tak sawrkar laipuiin min han pe leh teh hi keini Mizo hnam tlem zawkte tan chuan thil lawm awm tak a ni. New Delhi a cham mek kan Governor PS Sreedharan Pillai khan PM hnenah Mizorama All India Institute of Medical Sciences din sak tura ngenna te pawh min lo zu thlensak tawh a ni ..India khualehtuite hian hetiang Prime Minister ropui tak kan nei thei hi lawmna chang hre tur kan niin ka hria.
Sawrkar kum tharah sawrkarin sum a la inchingfel thei zel te hi kan lawmpui, Chief Minister-in State Budget cheng vaibelchhe sing chuang chu an duh dan dana an hman theih thu a sawi a, Project lian tak tak siamin Delhi lamah sum tam tak an la hnuk chhuak ruih ruih dawn tih te kha a nghahhelhawm hle a ni . Thahnemngai taka thu ziah hi a chakawm rualin inthlahrun a na duh khawp mai, huangtau zeta thu ziah erawh a nuam thin.Tun sawrkarah Dr R.Lalthangliana te an la tel remchang thei te hi mipui tan tak thil lawmawm a ni. An Ministry hmasa lamah khan hnathawk nasaa sawi a ni thin a; enlaiin in lam a thleng hman meuh lo, tih a ni thin. Tun congress term liam taah pawh Finance Dept. a in vuah fuh a, Entrepreneurial Govt.ah Mizoram sawrkar a inhlang hman tep anih kha. Home, Sports, Finance a tha a; zirna school te tha taka vil a ni, MIMER leh Tuirial hydel project chhawr theih an nita te hi thil lawmawm tak a ni. Vaivakawn leh Bawngkawn kawng pengthuam zauh hna thawh te hi Mizoram tan a tangkai hle. Mizoram Economic Association conference a hman puinaah Finance Minister hmingtha tak Pu Lalsawta’ n sawrkar laipuiin sum pek chhuah dan a tihdanglam hnuah Mizoram sawrkarin a tum ber chu recurring expenditure ngai chi tihtlem te, hmasawnna ruhrel din zawnga sum hman tam te, employment siam tam thei zawnga sawrkar kalphung her rem leh kut hnathawk, lo neitu leh entrepreneur-te’n tharchhuah leh thawhchhuah an neihna kawng zawn puite a ni a ti. Mizoramin thawhchhuah state own resource kan neih tlem avangin sawrkar laipui atanga sum hmuh ang ang chu mamawhna zawn tak a, tangkaina indawt dan fel taka ngaihtuaha hman a pawimawh thu a sawi nghe nghe. Congress hi tha takin a la indin chhuak leh ang;’ khenbehna a awm chuan thawhlehna a awm ang’ an ti alawm. A tha ber a la ni thei.
‘Ka rua sawi kha Bangalore atangin Pu Hawla sawrkar khan an la lut a, chumi bawk chu a ni kan lak luh tur chu’ tih thu te, Congress sawrkarin raw lian chi hman tangkai dan an hriat loh thu te, engkim that duhna rama awm kan nih dan te, ram ruak Sq.Metres 21,000 vel Mizoram in a la neih thu te mipui min han hrilh ve zel a, intodelh nan raw lian leh rubber chin an kalpui nghal tur thu te sawrkarna an chan hma hauhin kan hre lawk tawh a. Mau chungchangah bawk sawrkar laipui thuneitute an bangbozia te leh sut tur a chhah thu te, chutiangin Congress sawrkar chuan sawrkar tlak aimaha an zu zawrh tawpta an ui zawk maha miten an rin dante lam thu a lo thleng ve reng a. Sawrkarin NLUP sem a tihtawp thu leh Sign Board pawh hawlh thlak a nih thu leh District-3 tihputlinna tur Notification tihchhuah thu te kan han hria a, Dist.Hqrs hi la pian belh se a tha, a nihlawhthlak mipui tan a tha. Aizawl district mipui nuai-3 chuang awmna a Office dawr hautak lutuk kara awm reng ai chuan thil tih zung zung awlsam na district te zawka awm chu chak an la tam dawn tih kan CM-in a sawi a, mamawh ang zelin district hautak zawkah te hi chuan Mini-Secretariat thleng a dah hi State sawrkar leh mipui te tan remchanna tha tak a ni ang.
Eiruk leh discipline tha lo an huat thu te, Party inthliarna dah bo an duh thu te, MNF party bik Minister an nih lo thu te, kan han hriat khan sawrkar thar chu mipui tan an ngaihnawm dawn hle a kan hriat dan te lam titi honaah kan lo sawi ho ve mek bawk thin. Mipui te hnuaichhiah a, rapbet leh lalhrawt khum mai tur an nih loh thu te leh, Party dangte anga lalna leh thuneihna, sum leh pai ringawt uma an kal ve a thian loh thu an sawi te hian mipui min hneh hle. He sawrkar hian thu leh hla ngaihnawm tak tak an la nei chho reng a, khelmual paruk siam anih tur thu an rawn hawn leh zirna quality tha min pek an tum thu te, Congress sawrkar apiangin Education kan buai thin; thawktute hlawh pek fel leh School tan hun tihdanglam te chu, he Sawrkara kan thil hriat hmasa langsar te an ni . He Sawrkar hi kawng dang atan hman phal a nih loh thu te thlengin mipuite min han hriattir bawka, mipuiin sawrkar hmasa an demna ang kha awm lo se kan duh. MR zirtitu lak fel te, Hmarchak hmahruaituah sawrkarin Mizoram dah a tum thu leh, a buaithlak ber chu Delhi-ho zirtir thiam hmasak an ngaihthu leh an thiam sawt khawp dan te, a dawhthleng buaipui a ngaih tawh thu te thlengin kawtkai titina hmun ala luah ve reng. Kan ramah kan eisen loh a thar theih, chu chu an target pui ber a nih thu te, Investment ti duhte tan Mizoramah potential a awm thu leh, sawrkar hotute an inhawn thu te nen lam chutiangin Economic molecule-in Mizoram a khat… A hai chhuah ka Vision tih thungaihnawm tak tak te hian min la deng chho ve zel bawk.
Khua leh tui dik tak te chhinchhiahna tur – The Mizoram Maintenace of Household Registers Bill 2019 President hnena thawn kha engnge a an tak zel? VC-te thuneihna zau zawk pek te; tin, MZU southern campus-ah class tan a ni tawh em? MNF sawrkar hian tih tur leh thawh tur an ngah, Mizorama kan thar theih ve reng – Alu, Dal ,Tomato leh Vaimin chin uar leh zual te, raw tiak 79,200 phun tawh la phun belh zel te; Horticulture , sericulture, fisheries leh animal husbandry-a hma zau tak a lak te; hemi piah lamah Mizoram dinhmun a tha lo, tan lak a ngai tih thu kan Doner Secretary in a rawn sawi bawk nen sawrkar siam leh session koh an awl sam ang hu hian hna hi an thawk tawk zo lo ang tih hi ka hlau hle a ni. Mizoram leh a chengte tan tih tur leh thawh tur tam tak inthlan hma leh hnu pawhin an intuk ve a; chungte chu tha tak in hlense, mipui te hian kan duh.
‘MNF sawrkar ta se engtin nge sawrkarna an kalpui dan tur’ tih zawhna an dawn thin thu an sawi te kha rilruah a la reh lo. Mizoram chhim lam enkawl tu tur Southern Commissioner la dah te, Mizoram mipui te tan beidawnna tur la awmin ka hre lo, hun an la nei. MPF-te hmachhawp tha tak Good Government Project te pawh an rawn la tihhlawhting thei asin, kan MPF lam te pawh lo va leng lut tha ve leh se kan va beisei ve. An ni hi ‘kan ram siamthat nan Chanchin Tha a pawimawh ber’ titute an ni a. Thalaite hmakhua tur ruahmanna kawngah pawh kan beisei an rawn lakhum thei asin. Hawh u! an lakah hian nghahchhuah tur a awm ngei turah i la ngai phawt ang. Langtlang sawrkar, thianghlim leh tha, mipui tana nghenchhantlak ni turin ila duhsak zel ang u! Sawrkar hi kan duhsak demna turin kum tam a la ni lo, inthlan hmaa an insawi ang diak diakin hna an thawk thei kher hrih lovang, mipui te pawh anlakah inhnuhhniam chang kan neih a tul ang, chutichungin theihtawp chhuahse kan beisei a ni. Mizoram tan Comprehensive Tourism Master Plan leh North East Circuit at Mizoram central pawmpui tura ngenna te kha Mizoram min pawmsak ta em?
Sawrkar lakluh ni a, Mipui an laka kan mit a fuk dan te kha, mipuiin kan beisei san lai a ni mai ang a? Chief MInister tur pawh Aizawl East-1 atanga thlan tlin a ni dawn tih kan hria, lakluh naah Meghalaya CM leh Assam CM lo ni tawh Pu Mahanta te pawh an rawn kal dawn tih thu te kan han hre chawpchilha, hnam hla Halleluih-ah Chorus an sa dawn tih kan hriat laite bak kha an chanchin hi mipui tan ngaihnawm a tling lo thei. In zinga ta nghawngkawl te, zungtanga mi kawh te, sual laka tawngte hi in tihbo va, riltam te tan in inphal a, tihretheite in tihtlai bawk chuan, in eng chu thim zingah a eng chhuak ang … He sawrkar hi duhthawhtu antam tih an in hriat thar leh hi ka duh khawp mai. SEDP ennawn mek anih thu kan hria, ‘SEDP kan sawi thin kha kan kalpui dawn a, tunhmaa sawrkar kan hmuh tawh zawng zawng kha khum tura kal kan tum a. SEDP hi mitin a neitu kan ni dawn, kan flagship programme mau ni lo, raw lian chi pawh nasa takin kan kal pui ang. Langtlang sawrkar mi zawng zawngin anhriatpui theih tur kan siam dawn a ni, langtlang sawrkarah chuan corruption a awm thei dawn lo a, chutiang chuan sawrkar kan kal pui ang. India ram leh khawvel hmun danga chanchin tha hril turin Mizo te tluka a thuam hnam dang an awm lo. Malsawmna ruai chawihniam turin MNF hi Lalpa’n a ko a, MNF chu a hreipui, tuthlawh leh chempuiah min hmang dawn a ni, malsawmna hi Minister bialah tla na bik loin bial tinah inangtlang dial dialin kan kalpui ang.’ Sawrkar hian thil hi an sawifiah chikim a, Minister an nih vek theih loh dan te thlengin an sawifiah a, beng erawh a tlai hle a ni. Zoram siam danglam an tum dante thlengin kan hriatsak tawh. Sawrkar hi power (kawlphetha)-ah engmah an ni dawn lovin ka hria. Land Revenue hi uluk taka vil a ngai, chhungkaw tam tak lunghahna hmun pawh nei thei lo a, an awm hi thil runthlak tak a ni.
Sawrkar in kawng chhawng siam ngei a tum thu te, Main line-ah kawng chhawng tih vek an tum thu kan ngaithla chho leh a, remna thuthlung ngaihpawimawh te, Champhai leh Tahan inkara Bus service te, Eklavya Model Residential School panga hawnbelh te, puanzar nghal theih kan chief minister hnenah Urban Affairs Minister in a lo sawi football ground paruk siam a nih tur thu te, Admn&Dev.danglam tak thlentir te, Cable car service rawtna pawm te, vehicle outsourcing policy kalpui te, college pali model degree college a hlankaite; chutiangin, field chhawng te thlengin tihhlawhtlin an inhuam a. Aizawlah kawng pengthuam -14 nawr zauh anih tur thu te, District khawpuia kawng pengthuam lian deuh te nawr zauh belh tum anih thu te leh a siamna tur sum vaibelchhe-10 pawh neih a nih tawh thu te kan hre tawh a, Vaivakawn leh Bawngkawn flyover siam tur thu te thlengin an hnathawh hun hi nghakhlei takin kan lo la thlir mek zel hrih a ni. Kan CM-in SEDP kan tan tawh hna tam tak thawh a ni tawh tih a sawi a, mipui beisei an phak lohna hi a nasa a nih chuan election leh hi an tan a khirh ang. SEDP kan sem dawn khawp SEDP hi NLUP ang a ni ve lo, Congress sawrkarin NLUP beneficiary te hnenah cheng nuai tam tak a pek ang kha an SEDP hmang hian an khum thei dawn em? ‘Israel-te hruaitu atan a ruat tawh si che a, Lalpa chuan i tana thil tha a lo tiam tawh zawng zawng chu thlentir rawh, tih thu te hian rilru a luah hle a ni.
Remna palai atan sawmna kan hmu reng, sawrkar hotute Delhi lamah antlan thla cham chi reng a; rilru chungril kan inhre thei lo, kan ram tidam leh rawh miten an tih ngai tawh lova mipui tana rawngbawlna hi nei ngei se tih hi kan duh a ni. An hmabak a la ko, la insawn zo thei lo Assam Riffles insawn chhuahtir te, Union Home Minister Rajnath singh anhmuh thute kan la hre reng e, All India Service Cadre hran neih te, Act East Policy chungchang an sawipuite pawh ngaihtuahnaah a la awm ve reng; mumang ramah sawrkar cheng mek anga an sawi te thlentir loh hram se kan duh. Mizoram Chief MInister pawh tul leh thil pawimawh thlenin Delhi a thang mek tih te kan ngaithla a, Hmasawnna hi sawrkar inthlak vang a ni SEDP a taka kalpui anih hunah hnalian zawk te chu sawrkar laipuiah buaipui leh a nih tur thu leh central atangin a tam thei ang ber sum an hailuh hun te kan lo la bengkhawn ve reng a. Kan CM hian a sawrkar tan thahnem angai thiam hle mai; NITI Aayog Governing Council meeting-ah pawh Mizoram mamawh hrang hrang leh hmasawnna hnathawh tum dan te tarlangin theihtawp chhuahpui turin sawrkar laipui hotute a ngen a. Agriculture Transformation nei tura Mizoram bik tana ruahmanna siam a pawimawh thu te tilangin, Mizoram chu ram ralmuang tak a nih reng theih avanga entawn tur tha tak a awm thu leh, External Aided Project approval Process thui lutuk siamthat a ngaih thu te leh, NEC sum tam zawka thuamthat a tul thu te thahnemngai takin a sawi a. Kan Chief Minister hian Ministry hrang hranga a pawimawh chin chu a dawr kim hman vekin ka hria, tih tha pawh ka ti hle a ni. Aizawl khawpui helna tur Sairang – Zemabawk kawngpui tharte., Seling – Kawlkulh – Champhai kawngpui thar sial chungchang te, Kawlkulh – Tuivai kawngpui chungchangte, JICA hnuaia kawng thar sial chungchangte leh Durtlang Leitan – Sihphir leh leh Serkhan – Bagha kawngpui siam that chungchangte leh Lei hlui leh chak tawk tawh lote RCC leia thlak chung changte hi hlawhtling thei vek se kan va duh ve. Central Minister Nitin Gadkari khu hnathawk thaa sawi a ni a, congress hotute fak pawh parliament chhung leh pawnah a hlawh hle a ni .
Pathian hruainain 2021 kum tawp kan lo hnaih leh ta, kum a thar anga Assembly inthlan 9-na kan hnaih chho dawn, inthlan hi thleng leh theuh turin induhsak tawn ila. Kan thu hian tumah hi min khawihna lo se ka duh. Inthlan hnaih tawha Zoram mipui te thu hriat leh ngaihthlak te kha bengah a la cham reng. Inthlan kalta a bial hrang hrang han luhchilha han thlirlet pawh a chakawm hle mai, bial thenkhata Candidate te chu a lo hmuaktu aiin a zuitu an tam zawk a ni awm e. MNF Sawrkar hian Sawrkar chak zawk lam an la hawi hlei thei lo, a hniam zawnga an kal chang hmuh tur leh hriat tur a awm ta zawk mah. Sawrkar hmasaah khan term hnih chhung pawha bial hmasawn chuang lo an ni deuh vek hlawm, bial tin hi Sawrkar chakna mamawh tak vek Kan la ni hlawma, Sawrkarin bialtin tinzawna hna an thawh ngawrh loh chuan tlakna tham hna an lo thawk alawm mawle! Mipuiin kan la ti ang .