Chief secretary Dr Renu Sharma-i’n nimin khan ZMC, Falkawn tlawhin an hnathawh dan leh hmalakna hrang hrangte a en bakah thawktute nen ZMC-in harsatna a tawhte leh mamawh hrang hrangte an sawiho.
Chief secretary chuan ZMC project hrang hrang tihhlawhtlina tur leh infrastructure lam tihchangtlunna bakah COVID19 kaite enkawl kawngah a tul anga theihtawp chhuaha hmalakpui a tum thu a sawi a ni.
ZMC director Dr John Zohmingthanga leh a thawhpui ten chief secretary hi lo dawngsawngin, ZMC dinhmun tlangpui te an lo hrilh a. Chief secretary hian ZMC-a state referral hospital pawh tlawhin, medical superintendent leh a thawhpuite pawh kawmin, damdawi in kalphungte leh hmalakna hrang hrangte an sawiho.
COVID-19 kaite enkawl dan leh COVID ward hrang hrang dinhmun leh kalphungte Chief secretary ho hian an sawiho a. Chief secretary chuan PM cares atanga ZMC-in a dawn Oxygen plant pahnih – 300PSA leh 1000PSA, Viral research and diagnostic laboratory (RTPCR lab), ZMC Boys hostel leh Girls hostel sak mekte a tlawh bawk.