EDITORIAL 12/11/21


Kan sawrkar hian mipui a tithinrim palh ang e

Lunglei khawpuiin a mamawh ngawih ngawih thil tam tak zinga mihring nunna khawih thei thil RT-PCR laboratory chu high court ah hial an thlen avangin nimin khan gauhati high court chuan ni 10 chhunga bun fel turin thupek a chhuah leh a. Tun atanga rei vak lo ah laboratory chu an nei ve tawh turah ngaih theih a ni ta.
A hma atangin nasa takin Lunglei mipuiin he khawl an mamawhzia hi sawrkarah vawi tam tak an thlen tawh a. Mahse kan sawrkar chuan chhuanlam chi hrang hrang siamin he thil hi an pawt khawtlai ngar ngar a. RT-PCR lab for chhimbial tih pawlte a ding hial a. Kan sawrkar hian he laboratory din hi a hreh ngawih ngawih tih pawh hai rual a ni lo. High court in din tur a tih hnuah pawh chhuanlam an la zawng kual zel a. Tuna hetianga high court in thupek khauh tak a pek tak avang hian chhimbial lam pawhin an beisei hi an hlawhtling tawh turah ngaih theih a ni ta.
Mipui hmangaih leh enkawla, an ṭhatna duh ngawih ngawih tura intiama mipuiin an thlan tlin ten hetianga mipui hmusit leh an thu leh hla engahmaha ngai lova an hnuchhawn lui rei hi thil mak a ni a. Eng rilru pu in nge hetianga hma an lak duh loh tak tlat mai ṭhin hi ngaihtuah tham a ni. Mipui hmangaiha enkawl hi politician te mawhphurhna, an intiamna a ni. Mahse lalna leh thuneihna an chan hian chu chu an hmangsual ta ṭhin a. Khawiah pawh hetiang rilru pu hi chu mipuiin an chalah chhinchhiah ve tawh tur a ni tih hi mipui thinlungah awm nghet tlat se. He laboratory din tur chungchangah pawh hian kan sawrkar duhthu reng vanga din ni ovin, high court nawr luihna vanga din tur a ni tih hriat chian reng a ṭha khawp.
Chhimbialin laboratory an mamawh an nawrna kawngah hian mipui leh a hruaitute an fakawm tak zet a. Sawrkar lamin thu awihawm lo tak tak an fah a, a chang leh in mamawh lo an ti thul. Mihring rilru a in ang lova, ṭhemkhat tan chuan thinrima tharum thawh hialna tur ni tawh mai awmah pawh lungrual em em in ke an pen a. Hruaitute thu ngaichangin zai dawh takin, mawi lo leh tih awm loh ti hauh lovin an hlawhtling dawn niin a lang ta. An hmalakna hi a zahawmin a mawi tak zet zet a, Mizoram hmun hrang hrang mipui mamawh neite pawhin an chet dan hi an fak a, entawn tlak an va ni em.
Amaherawhchu, mipui an thuhmun fo thei lo tih ang khan chhimbial mipui anga dawhthei, dam dapa hma la ṭhin ang ni lo, thinrima hma la rup mai ṭhin hi kan sawrkar hian a tawng palh ang tih a hlauhawm hle. Sawrkar ke pen a dik loh chuan mipui thinrim sosang hian duh loh thleng thlengin thil an ti ṭhin tih hi hre mawlh teh se. Zaidawhna nena hmachhawntu ni lo, anmahni ang thoa ngawl tawt an tawn palh chuan pawi lian zawk a thleng thei tih hi hre reng se, Lunglei bial ang hi chuan hmun dang hi hmachhawn lo hram tawh se a ṭha khawp ang.

Leave a Reply

Your email address will not be published. Required fields are marked *

error: Content is protected !!