India-in ramria China chetna pawm ngai dawn lo


External affairs ministry chuan China-in India ram chin dan lova a luah leh China-in a ram chin anga India ram chin a chhal chu India-in a pawm ngai dawn loh thu a sawi.
Ministry thupuangtu, Arindam Bagchi-an Ningania thuthar lakhawmtute a kawmnaah, “China hian tun hnai kum eng emaw ti chhung ramriah thil a din a, dan lovin kum tam tak India ram a luah bawk a. India hian hetianga dan lova kan ram an luah leh dik lo taka Chinese-in an rama a chhal hi a pawm thei ngai lo vang,” a ti.
New Delhi chuan inpalai tawna inbiak chu a duh reng a, chu chu nakin zelah pawh an kal dan tur a nih reng thu a sawi.
Ministry chuan sorkarin ramri-ah hian hma thar lain thil tam tak a ti tih a sawi bawk a. Heng zingah hian kawngpui sial leh lei dawh pawh a tel a. Hengte hi ramri hnaiha chengten an mamawh inkalpawhna a nih nghal bawk thu a sawi.
“Sorkar hian ramri leh a chhehvela chengte tana hmsawnna thlen hi a tum a ni a, an khawsak phung tihhmasawn a tum reng a, Arunachal Pradesh pawh a huam a. Sorkar chuan hmasawnna thlen hian India himna a ram chin tihngheha a ram hauh chin tihchianna a ni bawk tih a hria a ni,” tiin Bagchi chuan a sawi.

Leave a Reply

Your email address will not be published. Required fields are marked *

error: Content is protected !!