Aizawl: India rama working journalist upa ber, prominent journalist, Padma Shri dawng thar, Lalbiakthanga Pachuau chu nimin khan I&PR Minister Lalruatkima’n a pisa-ah lengah sawmin, a chawimawina dawn a lawmsak a. I&PR department hotute leh MJA hruaituten an telpui bawk.
I&PR minister chuan Mizoram atanga Padma Shri award dawngtu mi pathum – Lalbiakthanga Pachuau, C. Kamlova leh B. Sangkhumi te an vaia a lawmpui thu sawiin, Lalbiakthanga chu Mizoram chanchinbumite zinga Padma Shri award dawng la awmchhun a nih thu leh ropui a tih thu a sawi a. I&PR department pawhin a chhuangin a lawmpui hle tih a sawi.
Lalbiakthanga Pachuau chu Association for Voluntary Blood Donation dinna kawnga sulsutu pawimawh, thalaite zinga thisen pek pawimawhna tilartu a nih thu I&PR minister chuan a sawi a. Ram tana service chhuanawm tak a neihte, kawng hrang hranga khawtlang tana a rawngbawlnate chu ngaihsanawm leh entawntlak a tih thu leh Padma Shri chawimawina chu a phu hlea a hriat thu a sawi bawk.