Krismas-ah thingrem siamtu

Krismas-ah thingrem siamtu

  • Rinfela Zadeng

Pathian hnam thlan Israel te chuan kum 2000 chuang kaltaah khan Pathianin thutiam ropui tak mai a tiam a; Juda chunga roreltu tur lal ropui tak mai, hriakthih ngat – Messia tia an koh chu zawlnei Isaia thuchah hmangin pek an ni dawn tih a tiam a. Israel fate chu an lawmin an nghakhlel hle a; Lal Davida aia ropui zawk leh thiltitheizawk lal ropui tak mai han neih chu an nghakhlel em em a. An chhehvela hnam dang Assuria leh Babulon ho te awpbehna hnuaia kun reng kha an ning em em tawh a; lal ropui leh thiltithei, khawvel puma roreltu ropui Messia ngei mai chu lo kal vat vat se an ti tawh hle a nih kha.

Thuthlung Hlui leh Zawlneite hrilhlawkna tifamkimtu
Juda te hi sakhaw mi tak, Jerusalem lam hawia tawngtai ngat ngat thin mihring an ni a; an sal tanna hmun emaw khawii emaw hmun atang pawhin Jerusalem lam hawia tawngtai ngat ngat thin an ni. An sakhaw lehkhabu thianghlim ‘Tanak’ chu an ringin an hre bel hle a; Tanak bua Zawlneite hrilhlawkna te chu an hre belin an chunga roreltu tur Pathianin pek a tiam chu an nghakhlel em em a. Pathian thutiam ropui tak mai chu lo thleng famkim vat vat tawh se an ti hle a, awpbeh leh vak vai an nihna ata chu an lal, ropui tak lo kal tur chuan titawpin rorelna chu tan tawh se tih kha Juda hnam te nghahhlelh em em a ni.

Bethehlem khuaa Mistiri leh a nupui raipuar
Israel fate’n nghakhlel taka Messia an lo nghah laiin kum BC 8-6 velah Rom lal Kaisara Augusta hnuaia Suria ram awptu Sentius Saturninus-a aiawha Kurinia’n Suria ram a awp laiin chhiarpui hmasa ber an nei a. Chutah chuan Galili ram atangin Mistiri Josefa leh a nupui Mari, rai puar teuh tawh chu Bethlehem khaw panin an kal ve a. Juda ho danah hmeichhiain fapa an hrin chuan ni sarih an bawlhlawh thin a, mi zingah an awm tur a ni lo. Chutiang avang leh mipui tam tak an kal khawm avang chuan Josefa te nupa chuan khualbuk an chang ve ta lo tih kan hmu.

Ran chaw pekna thlenga mu Lal Isua
Davida thlah zing atanga lo chhuak tur Israel te lal Messia chu ropui tak leh mi zahawm tak chhungkua atanga lo piang tura an ngaih laiin Bethlehem khuaa chhiarpuia hming ziak tura lo zin Mistiri te nupa inkarah a lo piang a; khualbuk an chan loh avangin ran chaw pekna thlengah an la mut zui! Lal Isua hi a piang changkang lo hle mai! Lal ropui tak leh khawvel chhandamtu, Krismas neitupa lo pianna hian Juda te pawh a bum a, Heroda leh Khawchhak Mifing te pawhin an hai a. Vawiina Lal Isua pianchampha lawmtute pawh hian Krismas nihna dik tak hre loa mahni duh zawng leh nawmsipbawlna atan leh sual tihpuitlinna hun atana hmang kan la awm fo mai!

Laltlawma!
Nu leh pa atanga chhuan tur nei lo, Mistiri fapa ve mai chu Pathian fapa a ni mauh mai! Unau zinga upa ber niin Jakoba, Simona leh Juda te hi a nau te an ni a; a unau te ngei pawh hian Lal Isua hi a n ring mai lo leh nghal! A pa Josefa hi a dam rei lo a ni ang – Bible-ah a chanchin kan hmu zui lo a, Lal Isua hian rawngbawlna atan hma hian kum 30 vel chu an chhungkaw khawsak mamawh leh eizawnna kawngah mawhphurtu ber a ni. Hmeithai chhungkua an nih avangin zah an hlawh tawk lo fo ang a, thingrem siamin hna a thawk fo ang a, nghawngkawl tangkaina leh rit phurh chhawkna atan a that zia pawh a tak ngeia hrechiang tu a ni.

Birth Day neitupa hi a ropui lo
Krismas hi ropui leh nasa taka lawm tuma kan inbuatsaihna hi sawisel ngawt theih a ni lo a, a hlut zia kan lanchhuahtirna kawng pawimawh tak pakhat chu a ni. Mi hausa ber atanga mi rethei ber pawhin Krismas kawr mawi neih kan tum thin a, kum pui lingletin kan erin kan ur thin a; Kohhran pawh a inbuatsaih nasain ruai nen kan lawm thin. Hripui lengin khawvel min tihbuai mek avangin Krismas pawh sum leh pai tam tak seng zawngin kan lawm thei ta lo a, mi hausa leh rethei kan kan intluk tlang rih hle. A ‘birth day’ neitupa ber Lal Isua pawh hi mi tlawm tak, Mistiri chhungkua atanga lo sei lian, hmeithai chhungkua ni zui ta, a unau leh a ram leh hnamin an rin loh leh an pawm loh mihring, anchhe dawng anga an ngaih tura Krawsa khenbeh a la ni zui! Krismas neitupa hi kan hriatchian nawna, a nihna phu tak leh a lawm zawng tak tura Krismas lawm hi kan tihtur a ni.

I inngaitlawm ve ang u
Kan zui leh kan rin, kan Pathian leh min chhandamtu Lal Isua hi mi tlawm tak, mihring a nih chhunga khawvel ropuina leh chawimawina te’n a duhsak ngai lem loh mihring a ni a. A rawngbawlnaah pawh hian vantlang zinga tlatlum lem lo naupang, hmeichhia, mi sual, chhiahkhawntu, sanghamantu leh Samari mi te bula hun hmang nasa kha a ni a. Khawvel ropuina leh thuneihna, lalna leh thiltihtheihna aiin chung lama ropuina leh chatuan nunna kha a thupui leh a nunpui, a thihpui leh a thawhlehpui, a lo pianchhan kha a nih tlat avangin keini pawhin tlawmna nun hi nei thar leh zual ila. Krismas te pawh hi mahni lam aiin mi dang tan zawka luanchhuah leh rawngbawlna lam hawia hman leh lawm hi uar thar deuh deuh zel ang u. Mi hausa leh mi retheite dinhmun thliartu Krismas ni awma lang thin hi mi rethei Lal Isua pianchampha a nihna lan tir tawh zawk ang u.

Leave a Reply

error: Content is protected !!