Health Minister Dr R Lalthangliana’n prime minister-in kumin January 16-a vaccine pek rûnpui a hawn atanga tun thla ni 10 thlengin Mizoramah Covishield dose 12,29,486 pek a ni tawh tih a sawi a. 1st dose pek tawh zat 7,00,373 (90%) niin, 2nd dose 5,29,113 (76%) pek tawh a nih thu a sawi.
Union Health Minister Dr. Mansukh Mandaviya hova online meeting-ah he thu hi nimin khan Dr R Lalthangliana chuan a sawi a. Mizoram sorkarin electoral roll, 2020 behchhanin kum 18 chung lam mi 7,75,106-in vaccine la theia a chhut laiin sorkar laipuiin September 15, 2021 khan Mizoramah kum 18 chung lam mi 8,67,000 awm anga a chhut avangin Mizoram sorkarin electoral roll thar ber atanga pek theih zat a chhut nen mi 91,894 laiin a inthlau tih a sawi a. Mizoram sorkar data leh ministry lam data a inmil loh avangin Mizoramin 90% hnena first dose pe tawh anga a chhut laiin sorkar laipui chuan 81% angin a chhinchhiah thung tih a sawi.
Dr R Lalthangliana chuan Mizoramin COVID-19 vaccine dose 15,82,680 a hmuh tawh atangin defence force hnenah dose 5,110 pek tawh a nih thu a sawi a, defence force-te chu insawn kual reng an nih avangin first dose la tawh, second dose lak hmaa Mizoram pawna transfer-te an awm thin a, hei hian full dose coverage-ah a tikhingbai tih a sawi.
Vaccine lak zawh hlima harsatna tawk, AEFI (adverse events following immunization) zingah mi 1,558 chu minor case niin, buaipui zui ngai an awm lo tih Dr R Lalthangliana chuan a sawi a. Serious case pathum awmin, mi thiamten an chhui zui mek thu leh damlo leh harsatna hrang hrang avanga vaccine lakna hmun pan thei lote zawng chhuaka vaccine pek thin an nih thu a sawi.
Dr R Lalthangliana chuan dam lo khuma mu mi 912 hnenah first dose pek tawh a nih thu leh anmahni viltu/enkawltu mi 32 hnenah first dose pek tawh a nih thu a sawi bawk.