Tuirial bialtu MLA K Laldawngliana’n “MNF hotute, kan chief minister, elected OB, minister leh MLA zawng zawngte hi Pathian rawn chung zela ram kaihruai thin, chapo ve lo, inngaitlawm leh Mizo taka nunze pu mi an ni” a ti.
Tuirial bial atanga MLA atana thlan thar K Laldawngliana chuan Tuirial biala lawmthu sawia khaw hrang hrang a tlawhnaah he thu hi nimin khan a sawi a. “Opposition party leh media hrang hrang atangin kan hotute hi sawiselin beihna awm thin mahse, Pathian leh mipui zarah kum 2023-ah MNF hi Pathianin he ram kaihruai tur hian thuneihna a pe leh ngei ngei ang tih ring ngam ang u” a ti.
K Laldawngliana chuan “Covid vangin kum hnih tha kan hotu ten hma la thei lo mahse, SEDP pawh kan hotute sawi ang ngeiin budget thar atang chuan hma an lak ngei ring ngam ang che u,” tiin Tuirial bial mipuite chu a hrilh a. MNF chu ‘Pathian leh kan ram tan’ titu party awmchhun kan ni a, kan lakah Pathian pawh a thikthu a chhe bik a, chuvangin, MNF worker-te chu an dikin an rinawm tur a ni a, an taima bawk tur a ni,” a ti bawk.
Tuirial bialtu MLA chuan Zanlawn, Serkhan, Lungmuat tlangdung te fangin amah vote tu leh vote lotute pawh a laka inthlahung lo tura chahin, thawhhopuiah a sawm a. Tuirial bial mipui tana bialtu MLA a nih thu sawiin, harsatna leh mamawh hrang hrang an neihte pawh inthlahrung lova a hnena thlen zel turin a chah bawk a ni.